Unazat në kraterin e gjetur në Mars ‘ndriçojnë’ klimën e kaluar të planetit të kuq!

Në pamje të parë, duket si një trung peme, por tipari rrethor në një imazh të sapo publikuar të kapur nga orbiteri ExoMars është në fakt një krater i pasur me akull në Mars. Ashtu si unazat koncentrike të një peme mund të na japin informacion të detajuar për klimën e kaluar të Tokës, modelet brenda kraterit ndriçojnë historinë e planetit të kuq, sipas Agjencisë Europiane të Hapësirës (ESA).

Imazhi është marrë vitin e kaluar nga kamera në bordin e ExoMars Trace Gas Orbiter, një anije kozmike e nisur nga ESA dhe Roscosmos, agjencia hapësinore ruse, që mbërriti në Mars në 2016 dhe filloi misionin e saj në 2018. Krateri në imazh është në një zonë të Marsit të njohur si Acidalia Planitia, fushat e gjera veriore të planetit.

Shkencëtarët po debatojnë mundësinë që rrafshinat veriore dikur të përmbanin një oqean të madh ose trupa të tjerë ujorë, ndoshta të mbuluar me akull. ESA tha se pjesa e brendshme e kraterit është e mbushur me depozita që ndoshta përmbajnë akull.

Thyerjet në formë shumëkëndëshi dhe gjysmërrethi në krater janë të mundshme si rezultat i ndryshimeve sezonale të temperaturës që shkaktuan zgjerimin dhe tkurrjen e materialit të pasur me akull, duke shkaktuar në fund të çara.

Përveç marrjes së imazheve mahnitëse të planetit të kuq, orbiteri po katalogon gazrat në atmosferën e Marsit dhe harton sipërfaqen për të gjetur rajone të pasura me ujë. Kjo do t’i ndihmojë shkencëtarët të kenë një kuptim më të mirë të historisë së ujit në Mars dhe nëse dikur e lejonte jetën të lulëzonte.

Pjesa e dytë e misionit do të fillojë në vitin 2023, kur një rover i ri do të eksplorojë një rajon të Marsit që mendohet se dikur ka pasur një oqean të lashtë dhe do të kërkojë nën tokë për shenja jete, tha ESA. CNN

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.