Vendimi i EMA për Sputnik V – Thuajse i pamundur që të merret këtë vit. Pritet në fillim të 2022

Rregullatori i barnave në Bashkimin Europian nuk ka gjasa të vendosë për miratimin e vaksinës Sputnik V të Rusisë të paktën deri në tremujorin e parë 2022, për shkak të mungesës së disa të dhënave që duhen për vlerësimin, sipas burimeve me njohuri për çështjen.   “Vendimi deri në fund të vitit është tashmë absolutisht i pamundur”- sipas një burimi për Reuters, që i referohej Agjencisë Europiane të Barnave.

Nëse të dhënat e kërkuara merren deri në fund të Nëntorit, atëherë rregullatorët mund të vendosin në tremujorin e parë të vitit të ardhshëm.  Agjencia europiane, që nisi vlerësimin fillestar të vaksinës ruse në muajin Mars, pritej të vendoste në Maj apo Qershor për miratimin e vaksinës.  Rezultatet e fazës së 3 të publikuara tek Lancet në SHkurt, treguan se është thuajse 92% efektive. Rusia bëri të ditur më vonë se Sputnik është rreth 83% efektive kundër variantit Delta.

Vaksina është përdorur gjerësisht në Rusi dhe është miratuar për përdorim në mbi 70 vende dhe burimet bënë të ditur se nuk ka arsye për të dyshuar efektshmërinë apo sigurinë.  Agjencia Europiane ka bërë të ditur se vaksina do qëndrojë nën rishikim deri sa të shfaqen prova të mjaftueshme për një aplikim zyrtar të autorizimit për tregtim.

Sipas burimeve, agjencia ka kërkuar një dosje më të plotë për mënyrën se si vaksina është prodhuar, përfshirë prodhimin e ingredientit aktiv dhe paketimin e produktit të përfunduar.   Miratimi i ngadaltë përbën një goditje për Moskën, që shpreson se miratimi ndërkombëtar rregullator do ta bëjë të konkurrojë me vaksinat e prodhuara në SHBA, që janë mbizotërues në tregun botëror.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.