Versace, gjyq në Shqipëri – Shtëpia e njohur e modës palë e tretë në Gjykatë

Një çështje e dorëzuar këto ditë në Gjykatën Administrative të Apelit ka për palë të tretë një nga shtëpitë më të njohura të modës në botë. Bëhet fjalë për Gianni Versace s.p.a e cila është me qendër në Milano.

Përfshirja e kompanisë në këtë dosje është si palë e tretë së bashku me Avokaturën e Shtetit kurse në interes të drejtpërdrejtë duket se është një biznesmen shqiptar i cili ka paditur Drejtorinë e Përgjithshme të Patentave dhe Markave.

Në objektin e çështjes përfshihen tre pika: së pari shfuqizimi i vendimit të Bordit të Apelit të Drejtorisë së Përgjithshme të Patentave dhe Markave, date 28.07.2016 dhe së dyti detyrimi i palës së paditur për të lejuar regjistrimin e markave sipas numrit përkatës të aplikimit. Së treti, detyrimin e palës së paditur për të paguar shpenzimet gjyqësore dhe avokatore.

Në Shqipëri numërohen disa raste kur pjesë e dosjeve në Gjykatë janë kompani të njohura edhe pse të paktën nga shtëpitë  e modës kjo rezulton të jetë e para.

Versace në rastin konkret nuk konsiderohet subjekt në gjykim, por detajet që mund të japë në raport me konfliktin e dy palëve në çështje mund të ndihmojnë në vendimin final. Pjesëmarrja në këtë rol në disa raste është vullnetare dhe në disa e detyrueshme.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.