A është e drejtë të lejohet peshkimi në zonat e mbrojtura detare?!
Përvoja e Lyme Regis Bay në Angli sugjeron që, nëse rregullohet mirë, peshkimi në zonat e mbrojtura detare nuk dëmton ekosistemin.
Lyme Regis, një fshat anglez me më pak se 4000 njerëz, me pamje nga Kanali Anglez, është i mirënjohur në komunitetin shkencor për fosilet e jashtëzakonshme Jurasike të gjetura aty pranë. Tani vendi i vogël britanik mund të vendosë një yll tjetër në gjoks, për rolin e tij pionier në një disiplinë që nuk merret me kafshët që kanë vdekur në të kaluarën, por me ato të gjalla në të tashmen, dhe të cilat ne po përpiqemi t’i ruajmë për të ardhmen ..
Siç u tha në një studim të botuar në Gazetën e Ekologjisë së Aplikuar të Shoqërisë Ekologjike Britanike, Lyme Regis ka eksperimentuar prej vitesh një menaxhim të zonave të tij të mbrojtura detare që është shumë i ndryshëm nga ai i aplikuar në pjesën tjetër të botës, i cili po sjell rezultate më të mira, në aspektin e ruajtjes, të shumë metodave të tjera të konsideruara më të sigurta dhe më efektive. Papritur, peshkimi është një pjesë integrale e kësaj strategjie.
Ndër objektivat e shumta që i kemi vënë vetes për vitet e ardhshme, nëse duam të bëjmë diçka pozitive për planetin dhe për veten tonë, ekziston ai i mbrojtjes së deteve dhe oqeaneve të Tokës gjithnjë e më efektivisht; dhe një nga projektet më ambicioze në këtë kuptim është 30×30, i cili synon të transformojë 30% të oqeaneve të botës në zona të mbrojtura.
Rruga për në vijën e finish-it, megjithatë, është e shtruar me probleme, dhe më e dukshmja është fërkimi i pashmangshëm me nevojat e peshkimit komercial: është e vështirë të mbrosh një të tretën e planetit kur (sipas FAO) në një të tretën e zonave të dedikuara për peshkim veprohet në peshkim të tepërt (overfishing). Jo vetëm kaq: studimet e fundit kanë treguar se masat mbrojtëse të aplikuara në shumë zona të mbrojtura janë një iluzion dhe nuk shkaktojnë përfitime të prekshme për speciet e mbrojtura. Çfarë lidhje ka Lyme Regis, i cili është (gjithashtu) një fshat peshkimi?
Një eksperiment i pavullnetshëm i bashkëjetesës midis nevojave ekonomike dhe nevojave të ruajtjes po vazhdon prej vitesh në Lyme Regis. Një pjesë e madhe e Gjirit të Lyme, ku mbwshtetet qyteti, në fakt është shpallur jashtë kufijve (offlimits) për një seri praktikash famëkeqe shkatërruese të peshkimit; peshkimi “i qëndrueshëm”, nga ana tjetër, për shembull që me kurthe statike të vendosura në fundin e detit për të kapur karavidhe, lejohet. Ekipi i Universitetit të Plymouth që kreu studimin ka monitoruar vazhdimisht ujërat e Gjirit të Lyme gjatë 11 viteve të fundit dhe zbuloi se ndalimi i llojeve të caktuara të peshkimit ka përfitime të mëdha që tejkalojnë dëmet e shkaktuara nga peshkimi i lejuar.
Të gjitha speciet detare vendore, edhe ato që peshkohen rregullisht, kanë parë që popullata e tyre të shpërthejë deri në 370%; sipas autorëve të studimit, kjo tregon se është e mundur që nevojat njerëzore të bashkëjetojnë me ato të ekosistemit edhe në zonat e mbrojtura: gjëja e rëndësishme është të zgjedhësh me kujdes se çfarë të lejosh dhe çfarë të ndalosh, sepse jo të gjitha aktivitetet e peshkimit kanë të njëjtin ndikim. FOCUS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.