Dollari, java e shtatë me radhë në rritje – Euro bie sërish drejt nivelit më të ulët në 2 vitet e fundit!
Dollari amerikan vijon të forcohet edhe në sesionin e sotëm dhe pritet të publikojë fitime për të shtatën javë me radhë. Fitimet më të mëdha, dollari i ka realizuar përballë jenit japonez, që po qëndron në nivelin më të ulët në 20 vitet e fundit. Shefi i Rezervës Federale, Jerome Powell, deklaroi të enjten se një rritje e normës bazë të interesit me 50 pikë bazë është në tavolinën e diskutimeve dhe një vendimi i tillë mund të merret në takimin periodik, që zhvillohet pas rreth 2 javësh.
Deklarata e Powell i rriti interesat e obligacioneve 5-vjeçare amerikane përmbi 3%, niveli më i lartë që nga viti 2018. Edhe euro iu rikthye humbjeve dhe po tregtohet pranë nivelit më të ulët në 2 vitet e fundit, pranë 1.0830 dollarë.
Referuar të dhënave të tjera, inflacioni bazë në Japoni u rrit me hapin më të shpejtë në 2 vitet e fundit, gjatë marsit, duke shtuar rrezikun se politikëbërësit mund të përpiqen të forcojnë monedhën vendase, në mënyrë që të parandalojnë rritjen e kostove për familjet dhe bizneset, si pasojë e inflacionit të importuar, kryesisht në ushqime dhe energji. Në tregun e kriptovalutave, bitcoin po tregtohet në mbi 40 mijë dollarë, ndërsa ethereum në rreth 3,000 dollarë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.