Irma, $200 mld dëme – Stuhia më e shtrenjtë në historinë e SHBA, ia kalon “Katrinës”
Uragani “Irma” është forcuar sërish, dhe me erërat që shkojnë deri në 260 kilometra në orë, është riklasifikuar si i kategorisë pesë. “Irma” rrezikon të bëhet stuhia më e shtrenjtë në historinë e Shteteve të Bashkuara të Amerikës.
Uragani pritet të prekë Floridën të Dielën në mëngjes. Dëmet e “Irmës” përllogariten të prekin shifrën stratosferike të 200 miliardë dollarëve, duke e bërë kështu stuhinë më të shtrenjtë në të gjithë historinë.
E Diela në Florida dhe një pjesë të konsiderueshme të gjirit jugor, do të jetë një ditë e gjatë dhe e tmerrshme. Vlerësohet se, deri më tani janë evakuuar 650 mijë njerëz vetëm nga Miami, ndërkohë që 5.6 milionë njerëzve iu është komunikuar që të largohen nga shtëpitë e tyre.
“Përgatituni për më të keqen”, deklaroi Donald Trump. “Irma” është një makth për industrinë e sigurimeve, thonë ekspertët. Vetëm në Florida dëmet përllogariten të prekin shifrën e 135 miliardë dollarëve.
Në vendet e Karaibeve, dëmet shkojnë në 10 miliardë dollarë. 8.5 milionë prona pritet të dëmtohen vetëm në Florida nga uragani. Thuajse gjysma e popullsisë së Floridas pritet të mbetet pa energji elektrike.
Për të kuptuar më mirë forcën shkatërruese të kësaj stuhie, mjafton të themi që dëmet që shkaktoi uragani “Katrina” në vitin 2005 u fiksuan në “vetëm” 160 miliardë dollarë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.