Propozim i ri për Ballkanin, “The Guardian”: Rregulla të BE për prokurimet në rajon

“Europa po përballet me një krizë të mundshme në Ballkan. Duhet të veprojë sa më shpejt”, kështu titullohet shkrimi më i fundit i “The Guardian”.

Artikulli i prestigjiozes britanike ndalet te kriza që po kalon Bashkimi Europian, nevoja për zgjerim drejt Ballkanit Perëndimor si dhe ndërhyrjet e Kinës dhe Rusisë në rajon.

“Qeveritë në Europë e përkufizojnë suksesin në bazë të krenarisë kombëtare dhe jo në bazë të rritjes ekonomike”, thuhet mes rreshtave. Duke i`u referuar strategjisë së sapo shpallur të Brukselit për t`u zgjeruar drejt Ballkanit perëndimor, “The Guardian” shkruan se, në rast se nuk do të ketë lajme të tjera pozitive në këtë drejtim, rajoni rrezikon të zhytet në destabilitet.

Madje, prestigjiozja flet edhe për një skenar si ai ukrainas që mund të vihet në jetë në rajon. Ndryshe nga disa vite më parë, sot në rajon ka konkurrencë gjeopolitike, thuhet më tej.

Kina është rasti konkret, pasi është kthyer në investitorin numër një në Serbi, ndërkohë që planifikon të ndërtojë linja hekurudhore të shpejtësisë së lartë në Pire dhe Budapest.

Kina shpreson që në të ardhmen Ballkani të integrohet në tregun e përbashkët europian, por nga ana tjetër, nuk e ka me ngut që projektet infrastrukturore në Ballkanin Perëndimor t`i nënshtrohen rregullave të Bashkimit Europian.

Pikërisht këtu mund të ndërhyjë Brukseli, duke nxitur vendet e rajoni të adopotojnë rregulla të përbashkëta për prokurimet.

Kjo gjë për rrjedhojë do të ndalte investimet kineze në rajon, ndërkohë që “The Guardian” hedh edhe idenë e kompensimit monetar në rast se kjo do të ndodhte.

Sa i përket Rusisë, prestigjiozja thotë se, Ballkani është mënyra me më pak rreziqe politike për të destabilizuar Bashkimin Europian.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.