Zjarri masiv përfshin Greqinë, mbi 50 persona kanë humbur jetën
Zjarri që ka përfshirë Greqinë nga e hëna, deri më tani ka përmasa gati tragjike, mbi 50 persona rezultojnë të vdekur.
Zjarret masivë të pyjeve shpërthyen pranë kryeqytetit të Athinës, duke djegur shtëpitë dhe duke plagosur më shumë së 150 veta.
Mëngjesin e hershme të kësaj të marte, Kryqi i Kuq tha se kanë gjetur trupat e 26 të vdekur në një vilë në qytetin bregdetar të Matit, raportoi AFP.
“Për fat të keq kemi gjetur 26 trupa të djegur, midis dy shtëpive”, tha Nikos Ekonomopoulos, kryetar i Kryqit të Kuq Grek.
“Pashë kufoma, makina të djegura. Ndihem me fat që jam gjallë”, tha një grua për Skai TV të Greqisë.
Dëmet në materiale janë edhe më të mëdha, mbi 100 shtëpi dhe 200 makina janë shkrumbuar nga zjarri.
Greqia lëshoi një apel urgjent për ndihmë për të luftuar zjarret që kanë dalë jashtë kontrollit. Qeveria ka shpallur gjendjen e jashtëzakonshme në Atikën Perëndimore dhe Lindore, ndërkohë Mekanizmi Europian i Mbrojtjes Civile, i është përgjigjur kërkesës për ndihmë. Po ashtu Spanja i ka ofruar avionë zjarrfikës, ndërsa SHBA dronë pa pilotë për të monitoruar situatën nga ajri.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.