4.3 milion euro të ardhura nga shitja e energjisë – FTL nis aktivitetin tregtar, shet energjinë e blerë nga prodhuesit me përparësi
Furnizuesi i Tregut të Lirë ka nisur aktivitetin e tregtimit të energjisë elektrike, ndërkohë që sipas të dhënave zyrtare përmes proceduarve të realizuara gjatë muajve prill dhe maj janë siguruar rreth 4.3 mln euro. Në total, për periudhën 24 prill deri 21 maj, në total janë shitur 77.600 Mwh energji me çmim mesatar prej 56.5 euro/ Mwh. Aktiviterti tregtar i FTL bazohet në një vendim të para disa muajve, që u mor nga Enti Rregullator i Energjisë, i cili kushtëzoi nisjen e shitjes së tepricave të energjisë në tregun e parregulluar.
Rreferuar legjislacionit në fuqi, shoqëria publike e furnizimit në tregut e lirë ka detyrimin për blerjen e energjisë elektrike nga burimet e rinovueshme të energjisë. Fillimisht, kjo energji tregtohet për mbulimin e humbjeve të Operatorit të Sistemit të Shpërndarjes me të njëjtin çmim me të cilin e blen këtë energji nga prodhuesit me përparësi të energjisë elektrike. Ndërkohë që, në rast të tepricave të krijuara ato tregtohen në treg të parregulluar me çmimin që ofron ky treg.
Shitja e energjisë nga FTL duket se do të balancojë disi shpenzimet që kryehen për blerjen e energjisë gjatë periudhave të thatësirës, për plotësimine nevojave konsumatore. Kjo pasi, vetëm për muajin korrik FTL shpenzoi rreth 4.8 mln euro për blerjen e energjisë, ndërkohë që krahasuar me korrikun e vitit të kaluar ka një rritje me 1.8 mln euro të shpenzimeve. Ndërkohë që, paralelisht është hapur edhe një procedurë për blerejen e energjisë për muajin gusht.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.