Brenti i Londrës, pranë 102 dollarë për fuçi – Rritja e infektimeve në Kinë rikthen shqetësimet për dobësimin e kërkesës!

Tregjet europiane të aksioneve po qëndrojnë në rritje në sesionin e sotëm, pasi shitjeve masive të një dite më parë. Indeksi pan-Europian STOXX 600 po qëndron në rritje me 0.5%, me thuajse të gjithë sektorët në territor pozitiv. Edhe shumica e tregjeve aziatike janë mbyllur në rritje, pavarësisht frikës se infektimet me Covid-19 mund të përhapen në Kinë.

Frika se karantinat në Kinë do të dëmtojnë ekonominë globale, rrëzuan tregjet në sesionin e kaluar, pavarësisht fitores së Emmanuel Macron, në zgjedhjet presidenciale në Francë. Gjithashtu, investitorët po presin fitimet tremujore të korporatave më të mëdha, si Alphabet, Microsoft Meta, Amazon dhe Apple. Në tregun e naftës, bençmarkët kryesorë po qëndrojnë në rritje të lehtë në sesionin e sotëm, pas humbjeve me mbi 4% një ditë më parë.

Nafta Brent e Londrës po qëndron në rritje me rreth 0.5% dhe po tregtohet në rreth 102 dollarë për fuçi. Gjithsesi, çmimet vijojnë të gjenden nën presion për shkak të shqetësimeve se karantinat në shumë provinca në Kinë do të dëmtojnë kërkesën për naftë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.