Brenti i Londrës tregtohet në mbi 117 dollarë – OPEC+ rrit prodhimin me 648 mijë fuçi në ditë, nuk është e mjaftueshme!

Nafta po tregtohet e qëndrueshme në sesionin e sotëm, ndërsa një ditë më parë u rrit ndjeshëm për shkak të dyshimeve nëse prodhuesit që janë pjesë e OPEC+ do të mund të rrisin prodhimin, në mënyrë që të plotësojnë mungesën e Rusisë.

Për këtë arsye, nafta Brent e Londrës është rritur në mbi 117.5 dollarë për fuçi, ndërsa nafta Bruto amerikane po tregtohet pranë 117 dollarë për fuçi. Organizata e Vendeve Eksportuese të Naftës dhe aleatët e tjerë, që ndryshe njihen si OPEC+, ranë rakord të rrisin prodhimin me 648,000 fuçi në ditë gjatë korrikut dhe gushtit, nga 432,000 fuçi që parashikohej në marrëveshjen fillestare.

Por, sipas analistëve kjo rritje është e pamjaftueshme për t’ju përgjigjur kërkesës gjithmonë e në rritje, sidomos në Europë dhe në SHBA. Prodhimi në Rusi ka rënë me rreth 1 milionë fuçi në ditë, që kur filloi pushtimin e Ukrainës në muajin shkurt, dhe pritet të bjerë edhe më tej për shkak të sanksioneve të Bashkimit Europian.

Gjithsesi, nafta Brent e Londrës pritet të bjerë lehtë gjatë kësaj jave, ndërsa nafta Bruto amerikane pritet të publikojë fitime prej rreth 1.5%. Në anën tjetër, të dhënat e qeverisë amerikane treguan se rezervat e naftës bruto ranë më shumë se parashikimet e analistëve, gjatë javës që u mbyll më 27 maj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.