Covid-19 mbush spitalet në Itali/ Kërkojnë krevate tek privatët. Roma shton stimujt financiarë
Italia ka shtuar stimujt financiarë për të mbështetur ekonominë e goditur nga virusi këtë Javë, ndërkohë që numri i rasteve vazhdon të rritet dhe spitalet në zonat më të goditura i janë kthyer sektorit privat për ndihmë.
Deri ditën e Martë, ekzistonin 2,041 persona të infektuar me koronavirusin dhe 52 të vdekur në Itali. Spitalet në rajonin e Lombardisë, që është epiqendra me 1,254 raste dhe 38 vdekje, po hasin vështirësi në kapacitet dhe i kanë bërë thirrje sketorit privat të shëndetësisë që t’i vijë në ndihmë.
Spitaleve private në rajon i është bërë thirrje që të japin hua krevatet tek sistemi publik i kujdesit të shëndetësisë, duke krijuar reparte të vogla për pacientë që janë testuar pozitiv me Covid-19.
Ndërkohë, kryebashkiaku i Milanos Beppe Sala i bëri thirrje qeverisë italiane dhe Europës për ndihmë financiare.
“Milano është qytet që ka dhënë gjithnjë dhe në këtë moment ndodhet në pozitë për të kërkuar”, tha ai. Ndikimi i virusit është ndjerë më shumë në rajonet e pasura të Lombardisë dhe Venetos, ku ndodhet qendra financiare e Milanos dhe qendra turistike e Venencias.
Industria e madhe e turizmit në Itali pritet të ketë pësuar goditje të madhe, për shkak të valës së madhe të anulimeve në hotele dhe ndërkohë që shumë vende përfshirë SHBA, kanë këshilluar kundër udhëtimit në Itali.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.