Dhëmbi i zbuluar po përmbys atë që dimë për njerëzit e hershëm!

Dhëmbi i një fëmije i zbuluar në një shpellë franceze ka zbuluar provat më të hershme të njerëzve Homo sapiens që jetonin në Europën Perëndimore. Zbulimi i molarit nga Grotte Mandrin, pranë Malataverne në Luginën Rhône në Francën jugore, së bashku me qindra vegla guri që datojnë rreth 54 mijë vjet më parë, sugjeron se njerëzit e hershëm jetuan në Europë rreth 10 mijë vjet më herët nga sa kishin menduar më parë arkeologët.

Për më tepër, dhëmbi Homo sapiens u vendos midis shtresave të mbetjeve të Neandertalit, duke treguar se dy grupet e njerëzve bashkëjetonin në rajon. Këto gjetje sfidojnë narrativën se ardhja e Homo sapiens në Europë shkaktoi zhdukjen e Neandertalëve, të cilët jetuan në Europë dhe pjesë të Azisë për rreth 300 mijë vjet përpara se të zhdukeshin.

Është hera e parë që arkeologët kanë gjetur prova të alternimit të grupeve të Homo sapiens dhe Neandertalëve që jetonin në të njëjtin vend, madje të paktën dy herë, sipas studimit të botuar në revistën Science Advances të mërkurën.

Më parë, ardhja e njerëzve të hershëm në Europë daton midis 43 mijë dhe 45 mijë vjet më parë, sipas mbetjeve të gjetura në Itali dhe Bullgari jo shumë kohë përpara se të gjendeshin mbetjet e fundit të Neandertalit të mbijetuar që datojnë 40 mijë deri në 42 mijë vjet më parë. Kjo kornizë kohore kishte bërë që shumë njerëz të mendonin se ardhja e Homo sapiens dhe zhdukja e Neandertalëve ishin të lidhura në mënyrë të pashmangshme.

Njerëzit dhe Neandertalët, të cilët ne e dimë nga analiza gjenetike, u takuan me njëri-tjetrin dhe patën fëmijë, duke rezultuar në gjurmë të Neandertalit në ADN-në tonë, të mbivendosura për një periudhë shumë më të gjatë në Europë, sugjeron ky studim.

Dhëmbët ruhen mirë në të dhënat fosile, dhe gungat dhe korijet e tyre janë paksa si gjurmë gishtash për arkeologët, duke dhënë informacione për prejardhjen dhe sjelljen. Forma e dhëmbit dhe struktura e tij e brendshme sugjeronin fuqimisht se ai i përkiste një fëmije njerëzor modern edhe pse dhëmbi ishte i dëmtuar, thanë studiuesit. CNN

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.