Elon Musk: Është më e rëndësishme që Tesla të bëj një robot sesa modele të reja makinash këtë vit!
Shefi ekzekutiv i Tesla-s, Elon Musk u shpreh se një robot humanoid është “produkti më i rëndësishëm” që Tesla po zhvillon këtë vit, duke e vënë atë përpara Cybertruck të shumëpërfolur dhe automjeteve të tjera, duke përfshirë Semi dhe Roadster.
Musk për herë të parë përmendi “Tesla Bot” në gusht duke përdorur një njeri me kostum roboti, duke paralajmëruar gjatë “Ditës së AI” të kompanisë se “ndoshta nuk do të funksionojë”, por shtoi se ai shpresonte të kishte një prototip vitin e ardhshëm.
Shefi i Tesla shtoi se kompania nuk ka plane të prezantojë Cybertruck këtë vit dhe se aktualisht nuk është duke punuar në një automjet prej 25,000 dollarë. Mungesa e vazhdueshme e çipave pengon lëshimin e modeleve të reja por pa rezultuar në dërgimin e më pak automjeteve, tha ai.
Ndërsa roboti Tesla mund të jetë vite larg dhe mund të mos realizohet kurrë, Musk tha se ai ka potencialin për të revolucionarizuar ekonominë nëse mund të kryejë detyra që tani mund të kryhen vetëm nga njerëzit. Përparimet në robotikë kanë lejuar kompanitë të zëvendësojnë punëtorë të caktuar me makina, por kufizimet e teknologjisë aktuale janë të tilla që shumë detyra ende duhet të kryhen nga njerëzit.
Roboti është një shembull i mjeshtërisë së Musk, në të cilin ai njofton se Tesla është duke punuar në produkte emocionuese të planifikuara për vite në të ardhmen që ndihmojnë për të energjizuar punonjësit, klientët dhe investitorët. Shpesh, risitë e shpallura nuk realizohen brenda afatit kohor të parashikuar.
Për shembull, në një ngjarje të “Ditës së Autonomisë” në prill 2019, Musk tha se kompania do të kishte 1 milion “robotaksi” autonome në rrugë në vitin 2020. Këto robotaksi ende nuk ekzistojnë. CNBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.