Emigrantët e BE në Britani/ Konservatorët: Nuk do të ketë më trajtim preferencial pas Brexit

Partia konservatore e kryeministrit Boris Johnson në Britani,  bëri të ditur gjatë fundjavës se do t’i japë fund trajtimit preferencial të emigrantëve nga Bashkimi Europian, nëse fitojnë zgjedhjet e muajit të ardhshëm.

Niveli i lartë i emigrantëve ka qenë një nga nxitësit kryesor i referendumit të vitit 2016 për të dalë nga Bashkimi Europian.

Konservatorët,  duke caktuar detajet e politikave të emigrimit pas Brexit,  bënë të ditur se personat nga 28 vendet e BE do të duhet të presin 5 vite përpara se të aksesojnë pagesat e mirëqënies, krahasuar me 3 muaj që është periudha aktuale.

“Pasi të dalim nga BE, do të kemi një mundësi për të trajtuar këdo që vjen këtu në mënyrë të barabartë”, tha Johnson.

Konservatorët bënë gjithashtu të ditur së do të rrisin shtesën e taksës që paguajnë emigrantët për të marrë shërbim shëndetësor në 625 paund nga 400, nga viti i kaluar.

Kjo do të përfshijë edhe emigrantët europianë, pasi liria e lëvizjes të përfundojë në Janar 2021. Konservatorët thanë se shumica e emigrantëve do të duhet të marrin një ofertë pune që të shkojnë në Britani, pavarësisht të kombësisë.

Përjashtime do të kenë vetëm për shencëtarët dhe ata që duan të nisin biznes. Konservatorët kanë premtuar një sistem të bazuar në pikë për emigrimin pas Brexit.

Sekretari i Jashtëm Dominic Raab tha ktë fundjavë se qeveria do të ketë kontroll tek emigrimi në mënyrë që të ketë përfitime dhe të reduktohen kostot dhe presionet.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.