Erdogan: Sulmet ndaj xhamive në Qipro nuk do të mbeten “pa përgjigje”!

Presidenti turk Rexhep Tajip Erdogan është shprehur se sulmet ndaj shtëpive fetare myslimane në Qipro “nuk do të mbeten pa përgjigje” pas raportimeve për një tentativë për zjarrvënie në një xhami në pjesën jugore, të njohur ndërkombëtarisht, greke qipriote të ishullit të ndarë mesdhetar.

Gazeta proqeveritare turke Daily Sabah tha se të paktën një i dyshuar u arrestua pas një përpjekjeje të 2 dhjetorit për të djegur Xhaminë e Madhe në qytetin e Larnaka. Askush nuk u lëndua nga incidenti.

“Fatkeqësisht, pati një (përpjekje) kundër xhamive tona në Qipron jugore. Sigurisht, ky operacion në Qipron jugore nuk do të mbetet pa përgjigje”, u tha Erdogan gazetarëve përpara se të nisej për në Katar për një vizitë dy-ditore.

“Kjo është ajo që ne po i themi Qipros jugore: mos kryeni akte të tilla sabotimi kundër shtëpive tona të adhurimit. Çmimi që do të duhet të paguani për akte të tilla sabotimi do të jetë i rëndë”, tha ai.

Qiproja u nda në vitin 1974 kur Turqia pushtoi pas një grusht shteti nga mbështetësit e bashkimit me Greqinë. Turqia është i vetmi komb që njeh një shtet qipriot turk në veri të ishullit dhe nuk e njeh Qipron si shtet.

Erdogan tha se Turqia po heton se kush qëndron pas tentativës për zjarrvënie.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.