FED: Inflacioni do të jetë tranzitor – Banka Qendrore në SHBA shkurton blerjet mujore. Nuk flet për normën e interesit

Rezerva Federale bëri të ditur se do nisë shkurtimin e blerjeve mujore të obligacioneve në Nëntor dhe t’i përfundojë në vitin 2022, por ruajti qëndrimin se inflacioni i lartë do të jetë tranzitor, pa detyruar një rritje të shpejtë të normës së interesit. Megjithatë, banka qendrore në Shtetet e Bashkuara, theksoi se problemet botërore të ofertës do shtojnë rreziqet e inflacionit dhe se zbutja e tyre do të ndihmojë në rënien e çmimeve.  Kryetari i Rezervës Federale, Jerome Poëell, tha se rihapja e ekonomive nga pandemia, ka nxitur rritje të çmimeve.

“Pabarazitë në ofertë dhe kërkesë të lidhura me pandeminë si dhe rihapja e ekonomisë, kanë kontribuar në rritje të madhe të çmimeve në disa sektorë. Në veçanti, problemet në ofertë po limitojnë reagueshmërinë e prodhimit ndaj rimëkëmbjes së kërkesës në afat-shkurtër. Për rrjedhojë, inflacioni ndodhet shumë sipër objektivit afat-gjatë prej 2%, u shpreh Kryetari i FED, Jerome Powell

Rezerva Federale, pavarësisht se lajmëroi një shkurtim me 15 miliardë dollarë të blerjeve mujore prej 120 miliardë USD të letrave me vlerë,  nuk sinjalizoi se kur mund të nisë faza e ardhshme e normalizimit të politikave, duke rritur normën bazë të interesit.  Zyrtarët e bankës theksuan se inflacioni i lartë do të zbutet, por ndryshimi i komunikimit tregon se ata presin që procesi të zgjasë më shumë.

Treguesi i prereruar i bankës për inflacionin, indeksi i çmimeve të shpenzimeve personale për konsum, është sipër dyfishit të objektivit që prej muajit Maj.  Poëell tha se nëse ekonomia vazhdon të tregojë progres, si ç’pritej, Banka Qendrore mund të përfundojë blerjen e obliacioneve  në muajin e ardhshëm.  Ai tha se politikëbërësit kanë fleksibilitetin për ta përshpejtuar apo ngadalësuar procesin, në varësi të gjendjes ekonomike.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.