Infektimet nga Covid, në rënie të qëndrueshme / OBSH: Për 7 javë me radhë, vdekjet bien në mënyrë më të ngadaltë

Numri i rasteve të reja të konfirmuara me Covid-19, të raportuara tek Organizata Botërore e Shëndetësisë, ka rënë për të shtatën javë radhazi, sipas drejtorit të përgjithshëm, Tedros Adhanom Ghebreyesus, që shtoi se vdekjet kanë rënë në mënyrë më të ngadaltë. Tedros tha në një konferencë mbi pandeminë se kjo është periudha më e gjatë e rënies së rasteve të reja që kur nisi pandemia.   Lideri i Organizatës shtoi se Afrika ka normën më të lartë të vdekshmërisë tek njerëzit e sëmurë rëndë në botë, pavarësisht se ka më pak raste të konfirmuara me Covid se çdo rajon tjetër.

Drejtori i përgjithshëm tha se koronavirusi po përhapet më shpejtë se ç’mund të shpërndahet vaksina, duke theksuar dhe prioritetin që i duhet dhënë popullsisë me rrezik të lartë në zona ku vaksina duhet më shumë. Ai tha se dozat botërore të vaksinave janë tashmë të mjaftueshme për të reduktuar përhapjen e virusit dhe shpëtuar shumë jetë.

Tedros tha se shumë vende kanë përshtatur masa publike që kanë përmbajtur me sukses përhapjen e virusit.   Ai tha se masat e distancimit social janë efektive kundër të gjithë varianteve.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.