Inflamacion i zemrës nga vaksina e Pfizer / Izraeli raporton lidhje të vaksinës me miokarditin tek meshkujt e rinj
Ministria e Shëndetësisë në Izrael, deklaroi se ka zbuluar disa raste të inflamacionit të zemrës, kryesisht tek meshkujt e rinj, që kanë marrë vaksinën e Pfizer në vend dhe se kjo me shumë gjasa lidhet me vaksinimin. Pfizer ka thënë se nuk ka normë më të lartë të kësaj gjendjeje, që quhet miokarditi, se sa mund të priste zakonisht në popullsinë e përgjithshme. Në Izrael, 275 raste të miokaditit janë raportuar mes Dhjetorit 2020 dhe Majit 2021, ndër mbi 5 milionë njerëz të vaksinuar, sipas ministrisë, që publikoi zbulimet e një studimi për të vlerësuar çështjen. Shumica e pacientëve që përjetuan inflamacionin e zemrës nuk kanë qëndruar më shumë se 4 ditë në spital dhe 95% e rasteve janë klasifikuar si të lehta, sipas studimit, që ministra tha se është zhvilluar me 3 ekipe të ekspertëve. Studimi zbuloi se “me shumë mundësi ka një lidhje mes marrjes së dozës së dytë të Pfizer dhe shfaqjes së miokarditit tek meshkujt në moshë 16-30 vjeç”. Sipas zbulimeve, kjo lidhje ka qenë më e lartë tek meshkujt në moshë 16-19 vjeç, krahasuar me grupmoshat e tjera. Pfizer deklaroi se është në dijeni të vrojtimeve të miokarditit në Izrael dhe theksoi se nuk është themeluar ndonjë lidhje me vaksinën. Efektet anësore rishikohen rreptësisht dhe Pfizer takohet rregullisht me Departamentin e Sigurisë së Vaksinës në Izrael. Izraeli nuk ka miratuar vaksinën për grupmoshën 12-15 vjeç ende, duke u bazuar tek raporti i ministrisë mbi miokarditin.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.