Japonia pezullon 1.63 mln doza të Moderna – Autoritetet raportojnë kontaminime në shishet e vaksinave

Japonia ka pezulluar përdorimin e 1.63 milionë dozave të vaksinës së Moderna kundër Covid-19, një javë pasi shpërndarësi i brendshëm mori disa raporte për kontaminim në disa vaksina. Si autoritetet në Japoni ashtu edhe kompania Moderna deklaruan se nuk është evidentuar asnjë çështje e sigurisë apo efikasitetit dhe pezullimi ishte vetëm një masë paraprake. Por, ky vendim ka bërë që disa kompani japoneze të anulojnë vaksinimet e planifikuara për të enjten.

“Moderna konfirmon se është njoftuar për rastet e grimcave të veçanta në dozat e vaksinës”, njoftoi kompania, e cila shtoi se “po heton raportimet dhe është e vendosur të punojë me partnerin e saj, Takeda, dhe me rregullatorët në Japoni për të zgjidhur problemin. Një zyrtar i Ministrisë së Shëndetësisë në Japoni deklaroi se, kompania Takeda fillimisht mësoi për shishet e kontaminuara në datën 16 gusht dhe e raportoi çështjen pranë qeverisë të mërkurën.

Vonesa ndodhi sepse Takeda kishte nevojë për kohë për të mbledhur informacion, se cilat shishe ishin të kontaminura dhe në çilën zonë ishin shpërndarë. Moderna, nga ana tjetër, deklaroi se kontaminimi mund të ketë ndodhur gjatë procesit të prodhimit, në një nga linjat e saj në Spanjë. Pezullimi është një pengesë e re për Moderna, pasi në muajt e fundit ka pasur vonesa në prodhim duke ndërprerë furnizimet për disa vende.

Ministria e Mbrojtjes në Japoni, që po zhvillon një vaksinim masiv në qytetin e Osakas, deklaroi se injektimet nga loti në fjalë që përbante 565,400 doza, ishte përdorur në perëndim të prefekturës mes 6 dhe 20 gushtit, por nuk tha se sa njerëz ishin vaksinuar. Japonia po përballet me valën më të keqe të infektimeve, kryesisht me variantin Delta, dhe po regjistron mbi 25 mijë raste të reja ditore, gjatë këtij muaji. Japonia ka vaksinuar 54% të popullsisë me një doza dhe 43% të popullsisë me dy doza.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.