Konflikti në Ukrainë “godet” grurin – Ekspertët shprehen se rendimentet e grurit dimëror të Ukrainës mund të bien me 15%
Pushtimi rus i Ukrainës kërcënon prodhimin e grurit. Nëse fermerët nuk mund t’i kryejnë shërbimet këto kultura rrezikojnë prodhimin, nga i cili varen shumë vende. Gruri u mboll vjeshtën e kaluar. Por fermerët ukrainas, të cilët arritën një prodhim rekord të drithërave vitin e kaluar, thonë se tani u mungojnë plehra kimike, si dhe pesticide dhe herbicide. Dhe edhe nëse do të kishin këto lëndë të para, ata nuk mund të marrin karburant të mjaftueshëm.
Ekspertët shprehen se rendimentet e grurit dimëror të Ukrainës mund të bien me 15% në krahasim me vitet e fundit nëse plehrat kimike nuk aplikohen tani. Disa fermerë paralajmërojnë se situata mund të jetë shumë më e keqe. Disa fermerë ukrainas i thanë Reuters se rendimentet e tyre të grurit mund të përgjysmohen, dhe ndoshta me më shumë, gjë që ka implikime përtej Ukrainës. Vende të tilla si Libani, Egjipti, Jemeni dhe të tjera kanë filluar të mbështeten në grurin ukrainas vitet e fundit. Lufta tashmë ka bërë që çmimet e grurit të rriten në qiell, deri me 50% në muajin e fundit.
Por, zyrtarët ukrainas ende shpresojnë se vendi do të ketë një vit relativisht të suksesshëm. Pjesa më e madhe e kësaj shprese qëndron tek fermerët në perëndim të vendit, të cilët, deri më tani, mbeten të larg konfliktit.
Kriza e bujqësisë në Ukrainë vjen pasi çmimet e ushqimeve në të gjithë botën tashmë janë rritur për muaj të tërë mes problemeve globale të zinxhirit të furnizimit që i atribuohen pandemisë COVID-19. Ukraina dhe Rusia janë eksportuesit kryesorë të grurit së bashku, që përbëjnë rreth një të tretën e eksporteve botërore dhe pothuajse të gjitha kalojnë përmes Detit të Zi. Eksportet e grurit janë bazike për ekonominë e Ukrainës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.