May bën thirrje për Brexit – Kërkon mbështetje në parlament. Do takojë Juncker së shpejti 

Kryeministrja britanike Theresa May, ka bërë një thirrje të fundit drejt deputetëve të partisë Konservatore, për t’u bashkuar në arritjen e një marrëveshjeje për Brexit që të jetë e pranueshme nga liderët europian.

Ajo tha se do kthehet përsëri në Bruksel të takojë Juncker dhe të flasë me të gjithë liderët e BE. Kryeministrja britanike Theresa May, ka bërë një thirrje të dëshpëruar drejt deputetëve të partisë Konservatore, për t’u bashkuar në arritjen e një marrëveshjeje për Brexit që të jetë e pranueshme nga liderët europian.

Në një letër drejtuar deputetëve, May tha se po planifikon të kthehet në Bruksel për bisedime të mëtejshme me presidentin e Komisionit Jean-Claude Juncker javën e ardhshme dhe se do të flasë me liderët e të gjithë vendeve anëtare në ditët në vazhdim. Arritja e një zgjidhjeje në Bruksel do të varet tërësisht nëse ajo arrin të bashkojë parlamentin britanik. May i bëri thirrje partisë së saj që të sakrifikojë preferencat personale për t’u bashkuar në shërbim të interesit kombëtar.

E përditshmja the Times, tregoi se retorika e May nuk do të funksionojë. Gazeta raportoi se Steve Baker,  Zv/Kryetari i Grupit të Hulumtimeve Europiane, i ka thënë kolegëve se Brukseli dhe Londra po pretendojnë të negociojnë duke harxhuar kohën, në mënyrë që marrëveshja e Brexit që May ka arritur më parë, të detyrohet të kalojë në parlament. Deputetët e refuzuan marrëveshjen e saj të Brexit më datë 15 Janar dhe një votë tjetër javën e kaluar dështoi gjithashtu.

Disa anëtarë të administratës së May kanë thënë se ajo me shumë gjasa ka vetëm 2 javë kohë për të shpëtuar marrëveshjen e Brexit, përpara se parlamenti ta marrë procesin nga duart e saj, në një votim më datë 27 Shkurt. May i bëri thirrje të gjithë anëve që të bëjnë kompromise, përndryshe rrezikojnë krijimin e një situate ku Brexit nuk ka për të ndodhur, diçka që do të cenonte demokracinë britanike.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.