Nafta e mbyll javën në rritje. Fitimet kufizohen nga Covid-19 dhe nga tensionet SHBA-Kinë
Çmimet e naftës po qëndrojnë në rritje në sesionin e sotëm, për shkak të dollarit të dobët. Por, megjithatë fitimet po kufizohen nga rritja e numrit të të prekurve me Covid-19 në Shtetet e Bashkuara të Amerikës dhe nga tensionet gjeopolitike SHBA-Kinë. Dollari amerikan preku nivelin më të ulët në 22 muajt e fundit përballë shportës me monedhat kryesore ndërkombëtare. Një dollar i dobët, zakonisht mbështet blerjen e lëndëve të para që tregtohen në monedhën e gjelbër, pasi i bën më të lira për zotëruesit e monedhave të tjera.
Nafta Brent e Londrës po tregtohet në rreth 43.4 dollarë për fuçi, ndërsa nafta Bruto amerikane po tregtohet në rreth 41 dollarë për fuçi. Ndërkohë, numri i amerikanëve që aplikuan për përfitimin e asistencës së papunësisë u rrit në mënyrë surprizë në 1.416 milionë persona, rritja e parë në rreth 4 muaj. Raporti sugjeron se rimëkëmbja e ekonomisë amerikane po dëmtohet nga rritja e numrit të të prekurve me Covid-19.
Parashikimi për rritjen ekonomike në SHBA u zbeh gjatë muajit të kaluar pasi disa shtete rikthyen masat shtrënguese, si pasojë e rritjes së rasteve me koronavirus. Gjithashtu, investitorët janë të shqetësuar edhe nga tensionet mes Kinës dhe Shteteve të Bashkuara të Amerikës, dy konsumatorët më të mëdhenj të naftës në botë. Të premten, Kina urdhëroi Shtetet e Bashkuara ta mbyllë konsullatën në qytetin e Chengdu, një shenjë hakmarrje ndaj vendimit të Uashingtonit për të mbyllur konsullatën kineze në Houston. Marrëdhëniet mes Uashingtonit dhe Pekinit janë përkeqësuar ndjeshëm, gjatë këtij viti, për shkak të disa çështjeve si lufta tregtare dhe teknologjike, koronavirusi dhe Hong Kongu.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.