Në mes të krizës globale të vaksinave, ky vend ka djegur gati 20 mijë doza AstraZeneca
Malavi shkatërroi 19,610 doza të skaduara të vaksinës AstraZeneca kundër Covid-19, vendi i parë afrikan që e bëri këtë, pasi Qendra Afrikane për Parandalimin dhe Kontrollin e Sëmundjeve (Afrika Cdc) konfirmoi se dozat e skaduara janë joefektive. Vaksinat, të prodhuara nga Instituti Serum i Indisë me skadim më 13 Prill, u dorëzuan në Malavi më 26 Mars, shkruan BBC, në një grumbull prej gjithsej 102,000 doza.
Faqja e gazetës lokale Nation Online postoi në mediat sociale fotografitë e dozave të djegura në një incenerator në spitalin qendror Kamuzu, në kryeqytetin Lilongwe.
Malavi mori një grumbull prej 360,000 dozash të AstraZeneca në fillim të marsit. Vaksinat e skaduara, nga ana tjetër, janë pjesë e një grupi tjetër, i cili mbërriti në fund të të njëjtit muaj dhe u përdor për gati 80%, siç raportohet nga BBC. Afati i fundit i datës 13 prill, shumë afër dorëzimit, nuk lejoi përdorimin e plotë.
Organizata Botërore e Shëndetësisë fillimisht kishte këshilluar që të mos shkatërroheshin dozat, duke ndryshuar mendimin e saj më vonë. Zëdhënësi i Ministrisë së Shëndetësisë të Malavit, Joshua Malango, megjithatë i ishte përgjigjur OBSH-së se dozat e skaduara tashmë ishin hequr nga i ashtuquajturi “zinxhir i ftohtë”, duke rrezikuar kështu ruajtjen e tyre në mënyrë korrekte.
Mopërdorimi i vaksinave të marra prek gjithashtu Sudanin e Jugut në Afrikë, i cili muajin e kaluar njoftoi skadimin e 60,000 dozave të AstraZeneca të dhuruara nga Bashkimi Afrikan pasi fushata e imunizimit, e planifikuar për në Mars, u shty për shkak të problemeve logjistike.
Malavi konfirmon deri më tani 34,231 infeksione dhe 1,153 viktima nga një popullsi prej 18 milion banorësh. Duke eliminuar dozat e prapambetura, profesionistët shëndetësorë shpresojnë të rrisin besimin e ulët të publikut tek vaksinat.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.