‘Nuk ka më ushqim, mos shpenzo më shumë energji’ – Zbulohet proteina që ndikon në metabolizëm!

Po sikur të kishte një proteinë të aftë për të ngadalësuar ose përshpejtuar metabolizmin? Sipas një studimi të publikuar në PNAS, një nga rolet e proteinës Augmentor-alfa do të ishte pikërisht të na bëjë të kuptojmë se kur është e përshtatshme të kursejmë energji në rast agjërimi, duke e vënë përkohësisht metabolizmin “në pauzë”. “Duket sikur ai të na thotë, ‘Hej, nuk ju ka mbetur ushqim, mos shpenzoni aq shumë energji!”, shpjegon Joseph Schlessinger, një nga autorët. Ky zbulim, thonë studiuesit e Yale, mund të jetë i dobishëm në zhvillimin e barnave të reja për trajtimin e sëmundjeve të ndryshme metabolike.

Augmentor-alfa shprehet kryesisht në neuronet agRP, të cilët ndodhen në hipotalamus (një rajon i trurit) dhe kanë për detyrë të na bëjnë të ndihemi të uritur: kur jemi në mungesë ushqimi ose agjërues rritet prania e proteinës në neurone, duke na komunikuar kështu se është rasti i kursimit të energjisë.

Duke krahasuar dy grupe minjsh, njëri në të cilin proteina ishte e pranishme në nivele normale dhe tjetri në të cilin mungonte, studiuesit vunë re se në rastin e parë brejtësit, në mungesë të ushqimit, reduktonin aktivitetin fizik dhe ruanin energjinë; në rastin e dytë, megjithatë, ata nuk kursenin energji dhe vazhdonin të ishin shumë aktivë edhe kur ishin agjërues, duke mos marrë sinjale “stop” nga truri, dhe për këtë arsye ishin shumë më të hollë se shokët e tyre.

Sipas studiuesve, frenimi ose rritja e efektit të proteinës mund të shërbejë për të kuruar sëmundje të ndryshme që lidhen me funksionimin e metabolizmit: një përmirësim i Augmentor-alfa do të ndihmonte ata që vuajnë nga anoreksia të rrisin peshën e tyre trupore, për shembull; përkundrazi, frenimi i efektit të tij mund të ndihmojë ata që vuajnë nga obeziteti të heqin kilogramët e tepërt.

Megjithatë, studiuesit besojnë se ajo e zbuluar rishtazi është vetëm një nga funksionet e shumta të proteinës Augmentor-alfa, e cila, duke u shprehur në hipotalamus – detyrat e së cilit janë të shumëfishta, nga riprodhimi, termoregulimi, tek përgjigja ndaj stresit – ndoshta është gjithashtu e përfshirë edhe në disa nga këto procese. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.