Obligacionet në SHBA mbështesin dollarin – Në tregun e kriptovalutave, bitcoin ngjitet në mbi 43 mijë dollarë
Tregu i monedhave vijon të karakterizohet nga qëndrueshmëria, por gjatë sesionit aziatik dollari amerikan gjeti një mbështetje, për shkak të rritjes së yieldit të bonove në Shtetet e Bashkuara të Amerikës.
Në anën tjetër, jeni japonez po qëndron në nivelin më të ulët në 6 vitet e fundit prej 121.4 përballë dollarit amerikan. Banka e Japonisë sinjalizoi javën e kaluar se do të vijojë me politikën monetare ultra lehtësuese, ndërsa bankat e tjera të mëdha kanë filluar me rritjen e interesave për shkak të inflacionit të lartë.
Ndërkohë, bençmarku i obligacioneve 10-vjeçare amerikane u rrit sërish, për shkak se investitorët kanë vendosur baste se Rezerva Federale do të ndjekë një politikë monetare më agresive. Në tregun e kriptovalutave, bitcoin ka zgjeruar fitimet dhe tregtohet në rreth 43 mijë dollarë, ndërsa ethereum në rreth 3 mijë dollarë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.