Putin sheh disa ‘përparime pozitive’ në bisedimet Rusi-Ukrainë!
Presidenti rus Vladimir Putin tha të premten se ishte bërë njëfarë përparimi në bisedimet e Moskës me Ukrainën, ndërsa Kremlini tha se konflikti do të përfundonte kur Perëndimi të ndërmerrte veprime për të adresuar shqetësimet e Moskës.
Në një takim të Kremlinit me presidentin bjellorus, Aleksandër Lukashenko, Putin tha se sanksionet perëndimore nuk do të pengonin zhvillimin rus dhe se Rusia do të përfundonte më e fortë. Ai më pas tha se negociatat ukrainase po zhvilloheshin pothuajse çdo ditë.
“Ka disa ndryshime pozitive, më thonë negociatorët nga ana jonë,” tha Putin. “Unë do të flas për të gjitha këto më vonë.” Ministri i Jashtëm rus Sergei Lavrov dhe ai i Ukrainës Dmytro Kuleba u takuan në Turqi të enjten në bisedimet e nivelit më të lartë që nga fillimi i konfliktit. Nuk u bë asnjë përparim.
Agjentët e inteligjencës amerikane thonë se Rusia është befasuar nga forca e rezistencës ukrainase dhe nga ashpërsia e sanksioneve ekonomike të vendosura nga Perëndimi. Rusia deri më tani nuk ka treguar asnjë shenjë se po ndryshon kursin.
Lukashenko i tha Putinit se të dy ishin nga gjeneratat sovjetike që kishin duruar sanksionet dhe se Bashkimi Sovjetik ishte zhvilluar mirë. “Keni të drejtë,” tha Putin. Bashkimi Sovjetik jetoi gjatë gjithë kohës nën sanksione, por u zhvillua dhe bëri arritje kolosale”.
‘LE TE SHPRESOJME’
Kremlini tha të premten se konflikti në Ukrainë do të përfundonte kur Perëndimi të ndërmerrte veprime lidhur me shqetësimet e ngritura vazhdimisht nga Rusia për vrasjen e civilëve në Ukrainën lindore dhe zgjerimin e NATO-s drejt lindjes. “Ne duhet të gjejmë një zgjidhje për këto dy çështje. Rusia formuloi kërkesa konkrete ndaj Ukrainës për të zgjidhur këto çështje,” tha zëdhënësi i Kremlinit Dmitry Peskov.
I pyetur nga gazetarët se si mund të përfundojë kriza, Peskov paraqiti pozicionin e Rusisë dhe tha se besonte se Ukraina po diskutonte kërkesat e Moskës me Shtetet e Bashkuara dhe vendet e Bashkimit Europian. “Le të shpresojmë. Kjo duhet të bëhet. Atëherë gjithçka do të përfundojë.”
Zyrtarët rusë nuk e përdorin fjalën “pushtim” dhe thonë se mediat perëndimore kanë dështuar të raportojnë për atë që ata e cilësojnë si “gjenocid” të njerëzve rusishtfolës në Ukrainën lindore. Perëndimi i ka hedhur poshtë vazhdimisht shqetësimet e tilla.
Putin thotë se “operacioni special ushtarak” në Ukrainë është thelbësor për të garantuar sigurinë ruse pasi Shtetet e Bashkuara zgjeruan anëtarësimin në NATO deri në kufijtë e Rusisë dhe mbështetën liderët properëndimorë në Kiev.
Ukraina thotë se po lufton për ekzistencën e saj, ndërsa Shtetet e Bashkuara dhe aleatët e saj europianë dhe aziatikë e kanë dënuar pushtimin rus. Kina ka bërë thirrje për qetësi.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.