Rreziku për zgjatjen e COVID-19 – Ekspertët britanikë mendojnë se valët e mëdha të COVID-19 në të ardhmen janë të mundshme

Epidemiologët kanë deklaruar se ekziston një mundësi reale e valëve më të mëdha të infeksioneve COVID-19 në Mbretërinë e Bashkuar në të ardhmen. Kryeministri britanik Boris Johnson ka hequr kufizimet ligjore, duke thënë se, ndërsa pandemia nuk kishte mbaruar, Britania do të duhet të mësojë të jetojë me COVID-19.

Grupi Shkencor i Influencës Pandemike për Modelimin, deklaroi se shfaqja e varianteve të reja virale ishte faktori më i madh i panjohur në periudhën afatmesme dhe afatgjatë, së bashku me uljen e imunitetit të popullsisë.

“Valët e mëdha të ardhshme të infeksioneve që kërkojnë menaxhim proaktiv për të parandaluar presionin e dëmshëm në sektorin e shëndetësisë dhe kujdesit kanë një mundësi reale që të ndodhin”, theksohet në deklaratën e Grupit Shkencor.

Britania ka raportuar në total 157,730 vdekje nga COVID-19, e shtata më e larta në botë, dhe kryeministri Johnson është përballur me kritika të ashpra për trajtimin e pandemisë, që ka regjistruar tre bllokime kombëtare.

Shfaqa e variantit Omicron në fund të vitit të kaluar ndezi një nivel të ri të infeksioneve, duke e shtyrë Johnson të rifillonte disa masa kufizuese, por vdekjet nuk u rritën me të njëjtin ritëm.

Ai tani ka rihapur plotësisht ekonominë, duke thyer lidhjen midis infeksioneve dhe vdekjeve, duke përmendur programin e vaksinave përforcuese të vendit, disponueshmërinë e antiviralëve dhe ashpërsinë e ulët të variantit Omicron.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.