Rreziqet e inflacionit në Eurozonë – Kazaks: BQE mund të rrisë 2-3 herë normat e interesit këtë vit!
Banka Qendrore Europiane duhet të rrisë së shpejti normat e interesit dhe të ketë hapësirë deri në tre rritje këtë vit, deklaroi politikëbërësi i këtij institucioni, Martins Kazaks, duke iu bashkuar zërave që bëjnë thirrje për një dalje të shpejtë nga stimuli monetar.
Një rritje e inflacionit në gati katërfishin e objektivit prej 2% të BQE-së, po intensifikon thirrjet për t’i dhënë fund një politike monetare ultra të lehtë gati dhjetëvjeçare.
“Një rritje e normës në korrik është e mundur dhe e arsyeshme,” tha në një intervistë Kazaks, i cili është guvernatori i bankës qendrore të Letonisë. “Tregjet po vlerësojnë dy ose tre hapa me 25 pikë bazë në total deri në fund të vitit. Nuk kam asnjë arsye për ta kundërshtuar këtë është një pikëpamje mjaft e arsyeshme për t’u marrë në konsideratë.”
Ai mendon se rritja e parë e normës bazë të interesit mund të ndodhë në korrik. Vlerësime të ndryshme e vendosin këtë normë nga 1% në 1.5%, tha Kazaks, shumë mbi normën aktuale të depozitave minus 0.5% dhe normën e saj kryesore të rifinancimit, e frenuar në zero.
BQE ka drejtuar deri tani tregjet për një rritje të normës vetëm “disa kohë” pasi skema e saj e blerjes së bonove, e njohur zakonisht si lehtësim sasior, përfundon në tremujorin e tretë. Por ky formulim është shumë i paqartë dhe një pjesë e madhe e Këshillit Drejtues të përcaktimit të normës po synon për t’i dhënë fund blerjeve të obligacioneve në fillim të tremujorit të tretë, kështu që normat mund të rriten në korrik.
BQE-ja do të mblidhet më 9 qershor, ku politikëbërësit pritet të vendosin një datë përfundimtare për blerjet e bonove dhe të japin udhëzime më të qarta për normat e interesit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.