Samiti Biden-Putin, më 16 Qershor / Pritet të zhvillohet në vilën zvicerane të shekullit të 18-të
Presidenti i Shteteve të Bashkuara, Joe Biden dhe presidenti rus Vladimir Putin, pritet të zhvillojnë samitin e tyre të 16 Qershorit në një vilë zvicerane të shekullit 18, me pamje nga liqeni i Gjenevës, çka përbën një vendndodhje qetësuese për bisedimet që priten të nxehta. Konfliktet e mëdha mbi ndërhyrjet në zgjedhje, sulmet kibernetike, të drejtat e njeriut dhe Ukraina, do të jenë ndër temat në takimin e parë që kur Biden mori detyrën më 20 Janar. Putin tha gjatë javës së kaluar se akuzat për hakimet, që disa lidhen me Rusinë, janë një përpjekje për të provokuar konflikt politik përpara samitit. Ai tha se pret që bisedimet të mbahen në një atmosferë pozitive, por shtoi se nuk pret ndonjë dakordësi. Stabiliteti strategjik bërthamor dhe konfliktet rajonale do të jenë gjithashtu ndër temat e bisedës. Biden, që ndodhet në Londër për samitin e G7, ka thënë se do i kërkojë Putin që të respektojë të drejtat e njeriut. Policia zvicerane dhe ushtria kanë caktuar barrikada dhe tela me gjemba përreth parkut që rrethon Vilën La Grange. Zvicra neutrale, që nuk i është bashkuar sanksioneve perëndimore kundër Rusisë në lidhje me aneksimin e Krimesë nga Ukraina në vitin 2014, ka lobuar për të mbajtur samitin e parë të fuqive të mëdha në vendin alpin në 35 vite. Në periudhën e Luftës së Ftohtë, Presidenti Ronald Regan dhe lideri sovietik Mikhail Gorbachev, mbajtën samitin e tyre të parë në Gjenevë në Nëntor 1985, ku ranë dakord të reduktojnë arsenalët bërthamorë. Sekretari amerikan i shtetit Antony Blinken dhe ministri i jashtëm rus, Sergei Lavrov do shoqërojnë Biden dhe Putin.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.