SHBA, në fokus të G7, Schaeuble: Do arrijmë marrëveshje për taksat
Ministri gjerman i Financave, Wolfgang Schaeuble deklaroi gjatë punimeve të samitit të Ministrave të Financave të G7-ës në Bari se palët do të arrijnë në një marrëveshje sa i përket çështjes së taksës koorporative.
Politikat e reja fiskale të administratës amerikane dhe politika fiskale globale do të jetë një ndër temat kryesore të axhendës së bisedimeve mes ministrave të G7-ës. Ministri italian i ekonomisë Pier Carlo Padoan deklaroi se plan i Donald Trump për të ulur ndjeshëm taksën mbi biznesin është tepër ambicioz dhe se me padurim pret të dëgjojë më shumë mbi këtë plan nga sekretari amerikan i thesarit, Steve Mnuchin.
Pavarësisht bisedimeve, dhe pavarësisht se tregtia globale sot kërcënohet si kurrë më parë, kjo çështje nuk do të diskutohet zyrtarisht mes palëve në Bari, dhe as në Taromina në fund të muajit kur do të takohen liderët e 7 vendeve më të industrializuara të globit.
Deklaratat e Schaeuble ndërkohë vijnë në një kohë që Gjermania dhe Shtetet e Bashkuara të Amerikës janë përfshirë në një luftë të ethshme deklaratash e kundërdeklaratash sa i përket tregtisë, pasi Trump akuzon Berlinin për tregti të pandershme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.