Të ardhurat e amerikanëve – Trump: Janë rritur me $7,000. Të dhënat zyrtare, jo dhe aq optimiste

Presidenti Donald Trump tha në nisje të javës se të ardhurat e amerikanëve janë rritur ndjeshëm gjatë presidencës së tij, duke kaluar rritjen e paraardhësve. Megjithatë, të dhënat zyrtare të Qeverisë, nuk e mbështesin këtë deklaratë.

Trump tha në një mbledhje të kabinetit se në 2 vite e gjysmë, të ardhurat neto janë rritur me rreth 7,000 dollarë.

Vlerësimet e Trump kanë ardhur nga Këshilli i Konsulentëve Ekonomikë, që ofrojnë këshilla për politikat ekonomike, sipas Shtëpisë së Bardhë.

Një raport i muajit Qershor i kësaj agjencie vlerësoi se de-rregullimet qeveritare do të ofrojnë 3,100 dollarë  në vit për ekonomi familjare deri në 2021-shin, ndërsa një deklaratë tjetër e Shtëpisë së Bardhë tregoi se paketa e taksave republikane do ta rrisë atë shifër deri në 6,600 dollarë për familje.

Trump e rrumbullakosi këtë shifër në 7,000 dollarë.  Megjithatë, të dhënat zyrtare nuk e reflektojnë këtë optimizëm për të ardhurat e amerikanëve.

Të ardhurat mesatare të përshtatura nga inflacioni u rritën me 1,400 dollarë në dy vitet e fundit, apo 2.3% nga 2016 në 2018, sipas byrosë së regjistrimit të SHBA.

Rritja në periudhën e presidentit Obama u regjistrua në 5%, ndërsa në periudhën e George W. Bush, pati një rënie prej 4.2%, periudhë ku përfshihej nisja e krizës financiare.

Edhe nëse shtohen përfitimet e paketës tatimore republikane, rritja e të ardhurave nuk arrin nivelin që theksoi Donald Trump.

Firmat private (TPC) vlerësojnë se personat me të ardhura të mesme kanë përfituar 930 dollarë në reduktime tatimore, por sipas Rezervës Federale në New York, tarifat ndaj mallrave kineze kanë fshirë këtë përfitim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.