Të dhënat për dozën e tretë, jo përfundimtare – OBSH: Nuk ka ende rezultate mbi përfitimet dhe sigurinë e vaksinave mbështetëse
Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus, deklaroi në konferencën javore për mediat se të dhënat mbi përfitimet dhe sigurinë e vaksinave mbështetëse kundër Covid-19 nuk janë ende përfundimtare.
“Për vaksinat e treta mbështetëse, të dhënat nuk janë ende përfundimtare përsa i përket përfitimeve dhe nuk e dimë ende nëse është e sigurtë. Dhe problemi i dytë është se disa vende kanë mundësi të sigurojnë një dozë të tjerë, ndërsa vende të tjera nuk kanë injektuar ende dozën e parë apo të dytë”, deklaroi drejtori i OBSH-së.
Ndërsa, shefja e shkencëtarëve të OBSH-së, Soumya Swaminathan, u shpreh në konferencën për mediat se, edhe në një takim të fundit mes shkencëtarëve u arrit në përfundimin e të dhënat e deritanishme për të dozë të tretë nuk janë përfundimtare.
Edhe javën e kaluar, OBSH bëri thirrje që vendet e pasura të mos injektojnë dozën e tretë dhe këto vaksina të shkojnë për vendet me të ardhura të ulëta, që nuk kanë ofruar ende shtresën e parë të mbrojtjes nga Covid-19 për popujt e tyre.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.