Vazhdojnë kërkimet tek trageti në flakë – Ekipet greke shpëtojnë 1 pasagjer, 11 janë ende të humbur
Operacionet e shpëtimit në Greqi, tek trageti që u pushtua nga flakët në det, vazhduan edhe në ditën e Diel, pasi një i mbijetuar u zbulua në tragetin që vazhdon të digjet, duke ngritur shpresat se pasagjerë të tjerë të humbur, mund të jenë ende gjallë. Të paktën 281 nga 292 pasagjerë dhe ekuipazh janë nxjerrë dhe transportuar të siguritë pas zjarrit që pushtoi tragetin italian, Euroferry Olympia në orët e para të ditës së Premte pranë Korfuzit, por operatori i tragetit dhe roja bregdetare bëjnë të ditur se 11 persona janë raportuar të humbur.
Zjarrfikësit janë përpjekur për ditë me radhë që të fikin zjarrin dhe ulin temperaturat e larta në anijen prej 183 metra, në mënyrë që ekipet e emergjencës të hyjnë në bord dhe të shpëtojnë të mbijetuar. Autoritetet nuk kanë lajmëruar ende ndonjë person të vdekur. Ekipet e shpëtimit janë shfaqur duke u ngjitur tek trageti me shkallë nga një anije e shpëtimit, pranë mjetit që po digjet në det. Të afërmit e personave të humbur janë mbledhur në portin e Korfuzit, me shpresën e lajmeve të reja për ta.
“Ai është ende gjallë, ai ka qenë një profesionist, me eksperiencë dhe është ende gjallë, ja u them me siguri. Veprime duhet të ndërmerren menjëherë. Nuk e dimë sa gjatë mund të durojnë njerëzit e ngecur atje”, u shpreh Vana Bekiari Mathiou, Gruaja e një pasagjeri të humbur.
Shkaku i zjarrit ndodhet ende në hetim dhe po ndiqet nga prokurorët, sipas zyrtarëve të rojës bregdetare. Trageti ishte nisur për në portin italian të Brindisit nga Igumenica. Shumë prej pasagjerëve ishin zotërues të kamionëve apo shoferë që transportonin mallra në Europë. Një pasagjer i shpëtuar ditën e Diel ishte nga Bjellorusia, sipas rojës bregdetare, ndërsa personat e raportuar të humbur janë bullgarë, turk edhe grekë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.