Virusi kinez: Ndalohet transporti në 13 qytete – Shkon në 41 milionë numri i banorëve të rrezikuar!
Qeveria kineze konfirmoi në 25 numrin e viktimave të deri tanishme prej koronavirusit duke rritur gjithashtu edhe numrin e rasteve të raportuara në 830. Autoritetet lokale kishin raportuar dje rreth 25 vdekje dhe 616 infeksione. Komisioni Kombëtar i Shëndetit shtoi se janë 1,072 raste të dyshuara aktualisht në shqyrtim.
Autoritetet kineze kanë vendosur bllokimin e transportit në qytete të tjera, Xiaogan, Enshi dhe Zhijiang, të gjitha në provincën e Hubei, djepin e epidemisë së koronavirusit, duke sjellë kështu numrin e qytetarëve të përfshirë në masat për të luftuar emergjencën në mbi 41 milion . Në shumë prej këtyre qyteteve, gjithashtu është rregulluar mbyllja e vendeve të hapura për publikun siç janë teatrot apo vendet e karaokeve.
Ndërkohë, autoritetet kineze kanë urdhëruar mbylljen e disa seksioneve të Murit të Madh për t’u përballur me urgjencën e koronavirusit. Ndërkohë, ka gjithsej 13 qytete kineze ku transporti publik është ndalur: këto janë qytetet Xianning, Xiaogan, Enshi dhe Zhijiang, Jingzhou, Huangshi, Qianjiang, Xiantao, Chibi, Ezhou, Huanggang dhe Lichuan, si dhe qyteti epiqendra e epidemisë, Wuhan, në Hubei.
“Një vaksinë kundër koronavirusit të ri mund të testohej te njerëzit në kohë rekord, më pak se tre muaj, në krahasim me 20 muaj të vaksinës SARS eksperimentale.” Kjo është thënë nga një prej ekspertëve kryesorë në botën e imunologjisë, Anthony S. Fauci, drejtor i Institutit Kombëtar për Alergji dhe Sëmundje Infektive (NIAID) të Institutit Kombëtar të Shëndetit (Agjencia e kontrollit qeveritar i Shteteve të Bashkuara përgjegjës për kërkime dhe shëndetin publik).
Dhe Disneyland Shanghai përkohësisht mbyll dyert e tij në mënyrë që “të garantojë shëndetin dhe sigurinë e njerëzve” prej epidemisë. Mbyllja e të gjitha strukturave do të fillojë nga nesër e Shtunë 25 Janar. (ansa)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.