Von der Leyen: ”BE do të intensifikojë bashkëpunimin me qeverinë e re të SHBA”
Fitorja e Joe Biden, si presidenti i ardhshëm i SHBA ka sjellë reagimin e krerëve të shteteve të Europës, dhe jo vetëm. Ndër ta ka qenë dhe presidentja e Komisionit Europian, Ursula von der Leyen, e cila nëpërmjet një deklarate me video ka cituar se SH.B.A. dhe BE ishin “miq dhe aleatë” duke shprehur se zgjedhjet presidenciale të SH.B.A. ishin një “moment me rëndësi edhe në këtë anë të Atlantikut”.
Von der Leyen ka përgëzuar Presidentin e zgjedhur Joe Biden dhe Zëvendës Presidentin e zgjedhur Kamala Harris dhe tha se ajo priste të punonte me ta në “sfidat e ngutshme globale”, të cilat përfshijnë pandeminë, ndryshimin e klimës, rregullimin dixhital dhe sigurinë globale.
Shumë udhëheqës botërorë kanë qenë të shpejtë për të përgëzuar administratën e re të SHBA pas politikës së jashtme të administratës Trump “Së pari Amerika”.
Von der Leyen e quajti partneritetin SHBA-BE “të pashembullt”, duke deklaruar se ai ishte i rrënjosur në “historinë e përbashkët dhe vlerat e përbashkëta të demokracisë, lirisë, sundimit të ligjit, respektimit të të drejtave të njeriut, drejtësisë sociale dhe një ekonomie të hapur”.
Kancelarja gjermane Angela Merkel gjithashtu e përgëzoi presidentin e zgjedhur, duke deklaruar se “miqësia transatlantike është e domosdoshme nëse do të merremi me sfidat kryesore të kohës sonë”.
Ekspertët kanë thënë se tërheqja e Trump nga marrëveshja e Parisit dhe përbuzja ndaj organizatave shumëpalëshe kanë ndikuar në partneritetin transatlantik. Udhëheqësit evropianë gjithashtu ishin përpjekur të shpëtonin Marrëveshjen Bërthamore të Iranit pasi Donald Trump u tërhoq nga marrëveshja dhe vendosi sanksione mbi Iranin.
“Amerika është më e dobët. Mashtrimet e Trump kanë dëmtuar fuqinë e butë të SH.B.A. – dhe procesi i fundit zgjedhor nuk ka ndihmuar,” shkroi Charles Grant, drejtori i Qendrës për Reformën Evropiane. Grant pret që BE të vazhdojë të ketë vështirësi për të krijuar marrëdhënie midis SH.B.A. dhe Kinës megjithëse ekspertët kanë thënë se Biden ka të ngjarë të riafirmojë aleancat tradicionale të vendit duke përfshirë edhe BE.
Por pavarësisht se është partneri më i madh tregtar i SH.B.A.-së, blloku ka të ngjarë të hasë në mosmarrëveshje tregtare me amerikanët.
Elefteria Zguri/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.