Euro tregtohet e qëndrueshme në 1.1 dollar – Ndërhyrja e Bankës së Japonisë rrëzon jenin deri në 125 përballë dollarit

Euro është rritur lehtë gjatë sesionit të sotëm, përballë dollarit amerikan, ndërsa jeni japonez po tenton rimëkëmbjen pasi regjistroi sesionin më të keq në 16 muajt e fundit, një ditë më parë. Të hënën, jeni humbi rreth 2.4% të vlerës, duke rënë deri në 125.1 në raport me dollarin, niveli më i ulët që nga gushti i vitit 2015, por më pas rikuperoi një pjesë të humbjeve, deri në 124.

Në anën tjetër, euro vijon qëndrueshmërinë dhe tregtohet në rreth 1.1 dollarë. Banka Qendrore e Japonisë bleu pak më shumë se 500 milionë dollarë në bono të hënën dhe njoftoi edhe tre blerje të tjera të palimituara për të parandaluar rritjen e yieldit të obligacioneve 10-vjeçare përmbi targetit prej 0.25%.

Lëvizja, që nënvizoi vendosmërinë e Bankës së Japonisë për të vijuar me politikat monetare ultralehtësuese, bie në kontrast me politikat që po ndjekin bankat e tjera qëndrore, si Rezerva Federale apo Banka e Anglisë, që kanë filluar me rritjen e interesave. Në tregun e kriptovalutave, bitcoin po tregtohet në rreth 48 mijë dollarë, ndërsa ethereum në rreth 3,400 dollarë. Ndër të dhënat ekonomike, investitorët po presin indeksin e besimit konsumator në Europë dhe të dhënat mbi punësimin në SHBA.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.