Greqi, plani për kreditë e këqija – Banka Qendrore do përdorë ‘aktivet tatimore të shtyra’ të bankave
Banka Qendrore e Greqisë ka hartuar një plan për të ulur stokun e madh të kredive me probleme, që bllokojnë bilancet e bankave të vendit, në përpjekje për të mbështetur huadhënien. Propozimi i bën thirrje 5 bankave më të mëdha të Greqisë që të transferojnë mbi 7.5 miliardë euro aktive tatimore të shtyra në një mekanizëm të veçantë, i cili do të emetojë më vonë obligacione dhe do ti përdorë të ardhurat për të blerë rreth 42 miliardë euro kredi me probleme që mbahet nga bankat.
Sipas kreut të stabilitetit financiar të bankës, Spyros Pantelias, ky transaksion do të shtojë besimin në sistemin bankar grek duke përgjysmuar portofolin e kredive të këqija. Sipas tij, kjo do t’i japë gjithashtu bankave greke akses në tregjet e kapitalit dhe do t’i japë mundësinë që të kanalizojnë kapital të ri në ekonomi.
Nga ana tjetër, Ministria e Financave po përfundon një plan rival, që është hartuar nga Fondi Helen i Stabilitetit Financiar, me ndihmën e manaxhuesit amerikan të aktiveve, BlackRock. Ministria e Financave punësoi bankën amerikane JPMorgan si këshilluese për të hartuar një propozim të dytë, që u modelua vitin e kaluar për të shpëtuar bankën italiane Monte dei Paschi.
Kjo e fundit do të përfshijë injektimin e parasë shtetërore, por do të reduktojë vetëm 10-15 miliardë euro kredi të këqija nga bilancet. Bankat greke ndodhen nën presion nga Banka Qendrore Europiane që të shpejtojnë uljen e kredive me probleme.
Këto kredi arritën në 88 miliardë euro në Qershor, thuajse sa gjysma e totalit të kredive bankare. Më herët, grekët shpresonin për themelimin e një banke që do të trajtonte kreditë me probleme duke marrë financim nga kreditorët, por kjo u kundërshtua nga BE dhe FMN.
Sipas bankierëve, propozimi i bankës së Greqisë përbën një zgjidhje alternative. Aktivet tatimore të shtyra iu dhanë bankave për të kompensuar humbjet e regjistruara gjatë ristrukturimit të borxhit qeveritar grek në vitin 2012. Këto përbëjnë 60% të kapitalit të bankave të vendit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.