Inflacioni në Turqi rritet në 48.7% – Niveli më i lartë në dy dekada. “Gërryen” të ardhurat e qytetarëve!
Inflacioni në Turqi është rritur në nivelin më të lartë në 20 vite prej 48.69% në Janar, sipas të dhënave të kësaj jave, nxitur nga përpjekja e presidentit Recep Tayyip Erdogan për të ulur normat e interesit dhe rënia e valutës në fund të vitit të kaluar. Çmimet e konsumit u rritën me 11.1% nga muaji i kaluar, sipas institutit turk të Statistikave, duke gërryer të ardhurat e turqëve. Të dy treguesit, mujor dhe vjetor, ishin sipër projeksioneve të analistëve. Lira turke ka humbur 44% të vlerës në vitin e kaluar, ndërkohë që banka qendrore shkurtoi normën bazë të interesit me 5% që prej Shtatorit, duke e çuar në 14%, nën përpjekjen e Erdogan për t’i dhënë prioritet rritjes së kreditit dhe eksporteve, pavarësisht inflacionit dyshifrorë. Pjesërisht në reagim të luhatjes së valutës, qeveria rriti një seri të çmimeve të administrueshme këtë vit, përfshirë gazin, energjinë elektrike, pagesat e rrugëve dhe biletat e autobusëve, duke shtuar presionet inflacioniste.
Paga minimale mujore u rrit me 50%. Çmimet e lidhura me transportin u rritën me 68.9% me bazë vjetore në Janar, ndërsa ushqimet dhe pijet u rritën me 55.6%, duke çuar treguesin përfundimtar në nivelin më të lartë në thuajse 2 dekada të lidershipit të Erdogan. Lira humbi 0.5% kundër dollarit në 13.56. Valuta është stabilizuar pas luhajteve gjigante nga 18.4 – 10.25 në muajin Dhjetor, pjesërisht prej ndërhyrjeve shtetërore në treg dhe skemës së mbrojtjes së depozitave. Ministri i Finacnave, Nureddin Nebati, parashikoi se inflacioni do të qëndrojë posthë 50% dhe do të arrijë majën në muajin Prill. Në fundjavën e kaluar, Erdogan zëvëndësoi kreun e institutit turk të statistikave dhe paritë e opozitës,së bashku me disa ekonomistë, kanë ngritur dyshime mbi shifrat e agjencisë. Instituti ka injoruar sondazhet që tregojnë se turqit mendojnë që inflacioni është më i lartë se sa tregojnë të dhënat.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.