Maqedoni e Veriut: Për pak muaj nis puna për t’u lidhur me gazsjellësin TAP
Pas pak muajsh, Maqedonia e Veriut do të nisë punimet për t’u lidhur me gazsjellësin Trans Adriatik Pipeline (TAP). Ministri i Ekonomisë në Maqedoninë e Veriut, Kreshnik Bekteshi tha se ndërtimi i interkonektorit të gazit me Greqinë do të nisë në mesin e këtij viti dhe do të krijojë mundësinë që gazi të mbërrijë nga Azerbajxhani edhe në këtë treg. Kjo raportohet nga ‘Zhurnal’, sipas së cilës, Bekteshi e bëri të ditur në fjalën e tij në Takimin e tetë ministror të Këshillit këshillëdhënës të Korridorit jugor të gazit, që u mbajt në kryeqytetin e Azerbajxhanit, Baku.
TAP do të transportojë gaz natyror nga fusha gjigande e Shah Denizit në Azerbajxhan pranë detit Kaspik, për në Europë. Gazsjellësi, i gjatë afërsisht 878 km, lidhet me Gazsjellësin Trans Anatolian (TANAP) pranë kufirit turko-grek në Kipoi, përshkon Greqinë, Shqipërinë dhe detin Adriatik, përpara se të mbërrijë në brigjet e Italisë jugore. TAP-i do të lehtësojë furnizimin me gaz të vendeve të Europës Juglindore përmes interkonektorëve të shumtë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.