Nafta, në nivelin e lartë 7-vjeçar – Çmimet, pranë rritjes mujore me 17% prej shqetësimeve mbi ofertën

Nafta është rritur me mbi 1% në nisje të Javës, pranë nivelit më të lartë në 7 vite që preku në sesionin e kaluar, ndërkohë që shqetësimet në lidhje me ofertën dhe tensionet gjeopolitike në Europën Lindore dhe Lindjen e Mesme, kanë çuar çmimet drejt rritjes më të madhe mujore në thuajse 1 vit. Nafta Brent e Londrës u rrit me 1.4% në 91.31 dollarë për fuçi. Nafta bruto amerikane shtoi 1.3% në 87.96 dollarë për fuçi.  Të dy çmimet referencë regjistruan nivelet më të larta që prej Tetorit 2014, në 91.7 dhe 88.83 dollarë, në mënyrë respektive, si dhe javën e 6 radhazi të rritjeve.

Për muajin në total, pritet një rritje me 17%, që është norma më e lartë që prej Shkurtit 2021.  Sipas analistëve, shqetësimet e vazhdueshme mbi mungesën e furnizimeve, së bashku me rreziqet gjeopolitike, kanë bërë që tregu ta nisë javën në performancë të fortë. Përveç pritshmërive se OPEC do të ruajë politikën e rritjes graduale të prodhimit , çmimet kanë vetëm faktorë pozitivë në horizont.  Organizata e Vendeve Eksportuese, së bashku me vende aleate si Rusia, që njihen së bashku si OPEC+,  kanë rritur objektivin e prodhimit çdo muaj që prej Gushtit me 400,000 fuçi në ditë. Megjithatë, vendet kanë dështuar të arrijnë nivelin objektiv, pasi disa anëtarë kanë hasur vështirësi me kapacitetin prodhues.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.