OBSH flet për nënvariantin BA.2 të Omicron – Van Kerkhove: Më infektues se origjinali. Pritet të qarkullojë më shumë
Organizata Botërore e Shëndetësisë pret që një version më i transmetueshëm i Omicron të qarkullojë më shumë në të gjithë botën, pavarësisht se nuk është ende e qartë nëse nënvarianti mund të riinfektojë njerëzit që kanë kaluar versionin origjinal të Omicron. Maria Van Kerkhove, shefja teknike e pandemisë tek OBSH, tha se agjencia po gjurmon 4 versione të ndryshme të Omicron. Sipas saj, nën-varianti BA.2, që është më ngjitës se versioni aktual mbizotërues BA.1 , ka gjasa të bëhet më i zakontë.
OBSH po monitoron nën-variantin BA.2 për të parë nëse shkakton një rritje të infeksioneve të reja në vende ku rastet me Omicron janë ngadalësuar së fundmi. Van Kerkhove theksoi se nuk ka të dhëna të një ndryshimi në ashpërsinë e infeksioneve nga nën-variantet. Omicron në total, nuk i sëmur njerëzit aq rëndë sa variantet alpha dhe delta, pavarësisht se përhapet më shpejt. Hulumtuesit në Danimarkë kanë zbuluar se BA.2 është rreth 1.5 herë më i transmetueshëm se BA.1 dhe se është më i aftë për të infektuar njerëzit që janë vaksinuar, madje edhe me doza nxitëse.
Van Kerkhove tha se vaksinat qëndrojnë tejet efektive në parandalimin e sëmundjes së ashpër dhe vdekjes, pavarësisht se nuk parandalojnë të gjithë infeksionet. Zyrtarët e Organizatës bën të ditur se është ende e paqartë nëse BA.2 mund të riinfektojë njerëzit që kanë kaluar nën-variantin fillestar të Omicron. Shumica e shteteve amerikane kanë konfirmuar prezencën e BA.2, por po qarkullon në nivel të ulët për momentin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.