Pakt për uljen e metanit në COP26 – Mbi 90 vende, në paktin e SHBA dhe BE për të luftuar ngrohjen globale
Thuajse 90 vende i janë bashkuar një përpjekjeje të drejtuar nga SHBA dhe BE për të shkurtuar emetimet e gazit të fortë serë, metanit, me 30% deri në vitin 2030, nga nivelet e 2020-s, një pakt që synon trajtimin e një prej shkaqeve kryesore të ndryshimit klimatik, sipas administratës së Biden. Metani është gazi kryesor serë pas dioksidit të karbonit dhe ka një potencial më të lartë të ngecjes së të nxehtit se CO2, por shpërbëhet më shpejtë në atmosferë, ç’ka nënkupton se shkurtimi i emetimeve të metanit, mund të ketë një ndikim të shpejtë në frenimin e ngrohjes globale.
Premtimi Botëror i Metanit, që u lajmërua fillimisht në Shtator, përfshin tashmë gjysmën e 30 emetuesve kryesorë të gazit, që përbëjnë për 2/3 e ekonomisë botërore. Ndër nënshkruesit e rinj është Brazili, një prej 5 emetuesve të mëdhenj në botë. Kina, Rusia dhe India, që janë gjithashtu në 5-shen kryesore, nuk kanë nënshkruar premtimin. Këto vende do të përfshihen të gjitha në një listë që identifikohen si shënjestra për t’u bashkuar.
Që kur u lajmërua në Shtator, me disa vende anëtare, Shtetet e Bashkuara dhe Bashkimi Europian, kanë punuar për të bashkuar emetuesit më të mëdhenj në botë të metanit te ky partneritet. Kishte thuajse 60 vende që nënshkruan javën e kaluar, pas një nxitjeje të fundit dipliomatike nga SHBA dhe BE përpara samitit të klimës COP26. Ndërkohë që nuk është pjesë e negociatave zyrtare të OKB, premtimi i metanit mund të kthehet në një nga rezultatet më të rëndësishme të konferencës, duke marrë parasysh ndikimin e mundshëm në parandalimin e ndryshimit klimatik.
Një raport i OKB në muajin Maj, theksoi se reduktimet e shpejta të metanit këtë dekadë, mund të shmangin një rritje me 0.3 gradë celcius në temperaturat botërore deri në vitin 2040. Nga ana tjetër, dështimi për të trajtuar metanin, mund të bëjë të paarritshëm objektivin e Parisit për të limituar rritjen e temperaturave botërore në 1.5 gradë Celcius sipër niveleve para industrialë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.