Pireu, porta e Lindjes drejt Europës – Gjiganti kinez COSCO rrit zotërimin me 16%. Do të transformojë portin
Kompania më e madhe kineze e dërgesave në det ka përfunduar një blerje shtesë prej 16% tek porti grek i Pireut, duke bërë hapin e parë në transformimin e portit drejt një qendre ndërkombëtare të tranzitit për produkte dhe shërbime mes Azisë dhe Europës. Porti i Pireut, nga anijet turistike e deri tek ngarkesat dhe kontejnerët, është më i madhi në Mesdhe dhe një nga më të mëdhenjtë në Europë.
Pas ceremonisë në nisje të Javës ku agjencia greke e privatizimeve transferoi aksionet që përfaqësojnë 16% në zotërim, tek gjiganti kinez i dërgesave COSCO, roli i portit mund të bëhet akoma më i madh. “Porti i Pireut është një vendndodhje shumë e mirë në kontinentin europian dhe një derë shumë e mirë në Jug të Mesdheut dhe për dërgesat e COSCO, pasi lëvizim shumë kontejnerë nga lindja e largët në Europë, e për rrjedhojë e përdorim portin si një derë drejt Europës”- tha Zeng Gangyu, kryetari i Bordit.
Muajin e kaluar, parlamenti grek amendoi një pakt me COSCO, që e lejoi firmën të rrisë zotërimin tek porti i Pireut, duke krijuar mundësinë për Greqinë që të sigurojë një investim gjigant. Pas miratimi të kontratës, zotërimi total i kompanisë kineze shkon në 67%. COSCO bleu shumicën e portit të Pireut në vitin 2016, pas një tenderi ndërkombëtar. Përveç rritjes së kapacitetit të kontejnerëve, Porti pritet të rrisë gjithashtu vendet e punës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.