Tërmetet largojnë turistët nga Ohri – VMRO-DPMNE kërkon dëmshpërblimin e akomoduesve

Dëmet në banesa dhe kaosi i krijuar nga tërmetet që kanë goditur qytetin e Ohrit kanë sjellë panik edhe për industrinë e turizmit në Maqedoni. Përllogaritet se prenotimet e dhomave për qytetet pranë Ohrit kanë rënë në mënyrë të konsiderueshme me 80%.

Turistët vendas e të huaj janë të larguar edhe nga frika për zgjimin e një vullkani të shuar prej miliona vitesh, pretendim të cilin ekspertët e kanë hedhur poshtë duke e quajtur thjesht sensacionalizëm.

Pronarët e banesave dhe hoteleve tashmë kërkojnë subvencione nga qeveria, për të mbuluar koston e riparimeve në mënyrë që t’i kthehen fitimit në këtë sezon veror, me shpresën se kjo mund t’u sigurojë jetesën.

Kjo kërkesë ka gjetur mbështetjen, në mos shtytjen, e ish-partisë qeverisëse VMRO-DMPNE, e cila ka dalë ditën e hënë në një deklaratë duke kërkuar dëmshpërblimin e plotë të banorëve. Sipas përfaqësuesve të partisë, ata kanë depozituar amendimet për buxhetin shtesë, ku parashikohet një masë e tillë.

Ohri është destinacioni kryesor turistik në Maqedoni, si për vendasit, ashtu edhe për të huajt, duke përbërë një ndikim të madh në PBB të vendit. Në total ka 17 mijë shtretër, nga ku 3500 në struktura hotelerie.

VMRO-DPMNE kërkon një dëmshpërblim prej 37,500 denarësh për shtrat, për një total prej 10 milionë eurosh. Kjo shifër duhet të paguhet vetëm për dëmet direkte, por duhen llogaritur edhe ato indirekte.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.