Tkurret konsumi në Britani – Shitjet me pakicë bien me normën më të shpejtë në 7 vite

Shitjet me pakicë në Mbretërinë e Bashkuar regjistruan rënien më të madhe në 7 vite për tremujorin e parë, ndërkohë që konsumatorët ndiejnë rritjen e nivelit të çmimeve. Zyra Kombëtare e Statistikave (ONS) raporton se volumi i mallrave të shitur në dyqane dhe online ra me 1.4% nga tremujori i fundit 2016, që është rënia më e shpejtë që prej 2010-ës.

Vetëm për muajin Mars, shitjet ranë me 1.8%, duke tejkaluar projeksionet e ekonomistëve për një rënie me 0.5%. Shifrat sjellin një perspektivë të zymtë për ekonominë që mbështetet shumë në shpenzimet konsumatore dhe shtojnë presionet te Banka e Anglisë për të ndërhyrë. Analistët e zyrës së Statistikave thanë se dobësimi vjen prej rritjes së çmimeve në të gjithë grupet e produkteve.

Ekonomitë familjare po pësojnë një tkurrje në të ardhurat e tyre në dispozicion, prej rritjes së kostove të ushqimit dhe karburantit, si dhe prej rënies së paundit që prej referendumit.  Çmimi i mallrave me pakicë të shitura në Mars u rrit me një normë vjetore prej 3.3%.  Shitjet në grupin veshje dhe këpucë ranë me 0.9%,  ndërsa të ushqimeve ranë me 0.5%.  Zyra raporton se rënia e konsumit për tremujorin do ti heqë 0.08%  Produktit të Brendshëm Bruto.

Shitësit me pakicë po ndjejnë gjithashtu presionin nga rritja e kostos së importeve dhe pagës minimale. Kompania e veshjeve “Next” ka paralajmëruar për një vit të vështirë dhe ka rënë me 14% në vlerë tregu që prej Janarit.

Klevis Llaha/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.