“Yield”-et në SHBA mbështesin dollarin – Euro teston nivelin më të ulët në 2 vite, nuk ndalet rënia e jenit japonez

Dollari vijoi forcimin edhe gjatë ditës së sotme, duke prekur një nivel të ri rekord 2-vjeçar përballë jenit japonez, ndërsa po teston nivelin më të lartë në 2 vitet e fundit në raport me euron. Rritja e yield-eve të bonove të thesarit amerikan po mbështet monedhën e gjelbër. Yield-i i obligacioneve 10-vjeçare amerikane, që është i lidhur ngushtë me inflacionin, është ngjitur në territor pozitiv për herë të parë në 2 vitet e fundit.

Indeksi që mat ecurinë e dollarit amerikan, përballë gjashtë monedhave kryesore ndërkombëtare, ka kaluar nivelin e 101 për herë të parë në 2 vite. Ndërkohë, monedha europiane vijon të tregtohet e qëndrueshme pranë 1.0780 dollarëve dhe po teston nivelin e rezistencës prej 1.0757 dollarë. Edhe pritshmëritë se Rezerva Federale në SHBA do të shtrëngojë politikat monetare po mbështesin dollarin amerikan.

Presidenti i Rezervës Federale të St. Louis, James Bullard, deklaroi se inflacioni është shumë i lartë dhe për këtë arsye norma bazë e interesit duhet të rritet në 3.5% deri në fund të vitit. Në tregon e kriptovalutave, bitcoin po tregtohet në rreth 41 mijë dollarë, ndërsa ethereum në rreth 3100 dollarë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.