Gjiknuri në Konispol: Zgjidhje problemit të certifikatave të tokës

Konispoli ishte ndalesa e radhës e drejtuesit politik të Qarkut të Vlorës Damian Gjiknuri i cili prezantoi kandidatin për deputet Ramis Husi. Në fjalën e tij para të pranishmëve, Gjiknuri kërkoi që të shfrytëzohet ky moment për të marrë më shumë mbështetje për Partinë Socialiste me qëllim zgjidhjen e problemeve me të cilat ndeshet komuniteti.

“Shans historik për të marrë më shumë mbështetje që edhe problemi i tokave të zgjidhet siç u zgjidh problemi i legalizimit që ishte një gangrenë e vjetër, për të cilën ne mbajtëm fjalën. Në këto vite ne i dhamë zgjidhje problemit të legalizimit në këtë zonë, mund të ketë mbetur tek tuk ndonjë gjë pa mbaruar, por ju garantoj se ky proces është i pakthyeshëm. Do zgjidhim edhe problemin e certifikatave të tokave, do zgjidhim edhe problemin e rrjetit energjetik pavarësisht se ka përmirësim të dukshëm pas ndërhyrjeve që kemi bërë këto kohë”, premtoi Gjiknuri.

Kandidati Ramis Husi u angazhua publikisht se qeveria e re dhe ai vet në Parlamentin e ardhshëm do të ushtrojë presionin e duhur që zona të mos ketë më probleme me bujqësinë.

“Shumë dhe më shumë do të bëjmë, Do të fillojmë dhe mbarojmë të gjitha punët për sa i përket problemit të bujqësisë. Nuk do të ketë më fusha të pa ujitura, nuk do të ketë më kanale të pa pastruara, nuk do të ketë më fusha të përmbytura në kohën e vjeljes së mandarinave të cilat për disa vite do arrijnë shifrën 1 milion. Ne do të mbështesim ju për pastrim, ujitje dhe gjithë infrastrukturën që ju të keni të gjithë mundësinë të nxirrni prodhimet tuaja në treg”, nënvizoi Husi.

Në një kohë kur në Konispol faza e parë e rikonstruksionit të qendrës së qytetit ka përfunduar, kryebashkiaku Shuaip Beqiri njoftoi nisjen e fazës së dytë.

“Kemi përfunduar shkollën e Konispolit që e keni parë të gjithë që është model. Kemi marrë investim për shkollën e Xarrës që fillon për 10 ditë dhe ajo pasi kanë mbaruar procedurat dhe do bëhet gjithashtu model. Kemi marrë investim për ujësjellësin e Konispolit që kur ika para 6 vitesh e lash me 6-8 orë ujë ndërsa kur u ktheva e gjeta me 1 orë në dy ditë. Në përfundim të investimit edhe Konispoli do ketë 24 orë ujë ashtu siç i takon”, u shpreh Beqiri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.