Gjiknuri takim me banorët në Akërni: Projekte investimesh në infrastrukturë

Drejtuesi politik i Qarkut të Vlorës Damian Gjiknuri shoqëruar nga kryebashkiaku i Vlorës Dritan Leli ishte në fshatin Akërni të Njësisë Administrative Novoselë. Ata u njohën nga afër me shqetësimet që kanë banorët e kësaj zone për çështjen e infrastrukturës rrugore ashtu sikurse për problemin e ujit dhe mbështetjes për bujqësinë.

Kryebashkiaku i Vlorës njoftoi se rruga tanimë është përfshirë në projektin e aplikimit për fondin e Bankës Botërore.

“Në projektin e ri të Bankës Botërore që është për 40 kilometra rrugë rurale, jua them me sinqeritetin më të madh se rruga e parë që është vendosur në aplikim është rruga e Akërnisë. Jo vetëm sepse kam ardhur këtu dhe ju kam premtuar se ajo rrugë do të bëhet por sepse mendoj se duke u investuar kjo rrugë e rëndësishme që ju shërben ju të gjithëve do ti hapet rruga investimeve të tjera më të rëndësishme siç është aeroporti që do mbajë emrin e Akërnisë”, nënvizoi Leli.

Ndërkaq, Gjiknuri insistoi se qytetarët e kësaj zone ashtu sikurse në të gjithë Qarkun e Vlorës duhet ti besojnë atyre që kanë dhënë prova që mund të bëjnë diçka për të zgjidhur problemet e tyre.

“Edi Rama dhe kjo qeveri e ka dhënë provën për Vlorën e mbi të gjitha është i lidhur me Vlorën. Besojuni atyre që kanë bërë për Vlorën, mos ju besoni atyre që premtojnë 10 por nuk kanë bërë asnjë. Të paktën, ne kemi bërë dy dhe mund të bëjmë edhe dy të tjera sepse jeta na ka mësuar të premtojmë pak e të bëjmë shumë. Kjo qeveri që ka dhënë ca prova konkrete është e vetmja që mund tu japë zgjidhje edhe të tjerave”, theksoi Gjiknuri.

SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.