Marsi i Pandemisë – Covid-19 në Shqipëri, masat dhe ecuria në shifra përgjatë një muaji – SCAN MAGAZINE

Sinjalet e pandemisë dhe rrezikut të saj kishin mbërritur në Shqipëri më parë se të trokiste muaji mars. Gati një javë me herët, që më 25 shkurt, Skender Brataj, kreu i Qendrës Kombëtare të Urgjencës Mjekësore, njoftoi se COVID-19 do të përhapet në Shqipëri, duke u kërkuar qytetarëve që dyshojnë se janë prekur të telefonojnë numrin e caktuar të Urgjencës Kombëtare 127. Ai udhëzoi të gjithë shtetasit shqiptarë që vijnë nga Kina, Singapori, Irani, Koreja e Jugut ose Italia, të telefonojnë në atë numër, në mënyrë që një grup mjekësor të mund tu kryejë atyre testimin përkatës. Po atë ditë ministria e shëndetësisë vendosi të rrisë buxhetin e spitalit me 1 milion dollarë, për të rritur stokun e pajisjeve të mbrojtjes personale.

Nga 1 deri më 7 mars, ndërkohë që në Itali gjendja sa vinte e bëhej më e rëndë edhe në vendin tonë shtoheshin zërat se ekzistonte rreziku që virusi të kishte mbërritur edhe në vendin tonë. Nuk munguan thirrjet nga mjekë të vecantë dhe nga opozita që ishte koha për të ndërprerë udhëtimet me Italinë.

Më 8 mars 2020, Shqipëria konfirmoi dy rastet e para me Koronavirus, një baba dhe i biri, të cilët kishin patur një udhëtim në Firence, dhe nga veriu i Italisë, kishin hyrë me rrugë tokësore nga Kroacia e Mali i Zi në vend. Atë ditë, qeveria ndaloi të gjitha fluturimet dhe tragetet që vinin nga zona veriore e Italisë deri më 3 prill. Po atë ditë qeveria gjithashtu mbylli shkollat për dy javë, me osionin e rishikimit të vendimit.

Më 10 mars, të gjithë qytetarët u njoftuan për masat e reja të bllokimit. Përdorimi i makinave private dhe automjeteve të transportit ndërkombëtar u ndalua në Tiranë dhe Durrës, dhe të gjitha transportet private dhe publike u ndaluan në Shkodër, Lezhë, Elbasani, Lushnjë, Fieri dhe Vlorë, me të vetmet automjete që lejoheshin të ishin ambulancat dhe automjetet për shpërndarjen e sendeve të domosdoshme.

Në mesditën e 11 marsit u shënua vdekja e parë nga koronavirusi në Shqipëri. Viktima ishte një grua 73 vjeçe nga DurrësI e cila ndërroi jetë nga komplikime vaskulare. Një ditë më vonë u njoftua se në shkallë vendi ishin kryer 145 teste për COVID-19. Të infektuar kishin rezultuar 23 vetë, 18 prej të cilëve ishin asimptomatikë. Të gjithë të infektuarit kishin patur histori udhëtimi në Itali. Po atë ditë (12 mars) kryeministri Rama njoftoi për masa shtesë të bllokimit përfshirë një shtetrrethim 72-orësh. Bankat e kufizuan orarin e punës deri në orën 13.00 ndërkohë entet fetare njoftuan pezullimin e shërbesave deri në 3 prill.

Më 13 mars u vendos shtetrrethimi i plotë. Ministria e Shëndetësisë njoftoi se numri i të prekurve me Koronavirus kishte shkuar në 33, pas kryerjes së 159 testeve në total. Po në atë ditë, qeveria njoftoi mbylljen e qyteteve të mëdha, përfshirë edhe Tiranën. U bllokuan rrugët dhe qarkullimi i makinave private si dhe u urdhërua mbyllja e të gjithë bizneseve (me përjashtim të farmacive dhe dyqaneve ushqimore).  Udhëtimi me det nga Greqia dhe Italia u ndalua, përveç anijeve të mallrave.

Më 15 mars, Shqipëria mbylli të gjitha kufijtë e saj tokësorë, deri në njoftimin e mëtejshëm, duke bërë të ndaluar të gjithë udhëtimet nga Mali i Zi, Kosova, Maqedonia e Veriut dhe Greqia. Institucionet arsimore u urdhëruan të përgatiten për lëvizjen e udhëzimeve në internet. Të gjitha operacionet fizike të qeverisë përveç veprimtarive thelbësore u mbyllën. Të gjitha muzetë, kinematë, teatrot dhe parqet publike u mbyllën përfundimisht. Përveç ndalimit të automjeteve private, ndalimi i transportit publik u shtri edhe në akset kombëtare Shkodër-Lezhë, Elbasan-Korçë, Lushnjë-Fier, dhe Fier-Vlorë.

Më 16 mars, Shqipëria pezulloi të gjitha fluturimet ajrore. Më 16 mars, u miratua një tjetër “legjislacion urgjence” i gjerë, duke specifikuar gjobat e ndryshme për shkelje të protokollit, që të ishin efektive menjëherë. Stacionet televizive u ndaluan të kishin më shumë se dy persona në të njëjtën dhomë për një shfaqje bisede. Një “Akt Normativ” i qeverisë, që ishte një ligj emergjent hyri në fuqi pa miratimin paraprak nga parlamenti. U vendos një shtetrrethim kombëtar duke ndaluar daljet pas orës 18:00 e më tej. Një ditë më vonë më 17 mars u njoftua zyrtarisht se në vend kishte 55 të infektuar me koronavirus.

18 mars shënohet viktima e dytë e Covid-19 në Shqipëri. Një 66-vjeçar nga Lushnja ndërroi jetë mëngjesin e asaj të mërkure në spitalin Infektiv – ku ndodhej prej ditësh në respirim të drejtuar. Numri i personave të prekur nga koronavirusi u rrit në 59 vetë, pas publikmit të rezultateve të 60 testimeve të reja dhe harta e të prekurve u shtri nga Tirana në Durrës, Fier, Elbasan, Lushnje dhe Rrogozhinë. Mes të prekur, nëntë prej të infektuarve ishin mjekë dhe infermierë nga të cilët tetë nga Sanatoriumi “Shefqet Ndoqi”, dhe një mjek nga spitali rajonal i Durrësit.

22 Mars. Shqipëria shënoi numrin më të lartë të rasteve të reja me COVID-19. 13 persona rezultuan pozitivë nga 33 testime të kryera në 24 orë. Harta e zonave të prekura u zgjerua gjithashtu me Korçën.

Në total numri i personave të infektuar me COVID-19 në Shqipëri shkoi në 89, ku Tirana mban numrin më të lartë me 63 të prekur. Një ditë më vonë me 23 mars u zbuluan 15 raste të reja nga 45 testime të kryera, duke e çuar numrin total të personave të prekur nga koronavirusi në 104. Ndërkohë po atë ditë numri i viktimave u dyfishua nga 2 në katër. Humbën jetën një 71-vjeçar me origjinë nga Kuçova, i cili vuante edhe nga kanceri në mushkëri dhe 43-vjeçari nga Kavaja, i cili nuk kishte sëmundje të tjera. Harta e zonave të prekura u zgjerua me Vlorën dhe Shkodrën.

Më 24 mars ndërroi jetë pacienti i pestë me COVID-19. Ai ishte një 49-vjeçar nga Tirana – me sëmundje shoqëruese diabet, dhe prej 10-ditësh ishte mbajtur në terapi intensive. Instituti i Shëndetit Publik njoftoi se gjatë 24 orëve të fundit u evidentuan 19 raste të reja. Harta e zonave të infektuara u shtua me Hasin, Beratin dhe Lezhën. Në spitalin infektiv ishin të shtruar 57 pacientë. Në total numri I të infektuarve shkoi në 123 persona, të zbuluar nëpërmjet 930 testeve të realizuara nga ISHP që nga fillimi i epidemisë. Më 25 mars, harta e COVID-19 u zgjerua me Krujën dhe numri itë prekurve u shtua edhe me 23 raste të reja, të nxjerra nga 111 testime të kryera ato 24 orë. Në total numri i të prekurve nga COVID-19 shkoi në 146 persona. Qeveria shpalli gjendjen e “Katastrofës natyrore”, një vendim që i detyron të gjithë qytetarët të mbyllen në shtëpi, me një ndalim-qarkullimi prej 16 orë në ditë.

Më 26 mars në spitalin Infektiv, një 71-vjeçare humbi betejën me sëmundjen duke e çuar numrin e viktimave në 6. Nga 103 testime të kryera nga ISHP, 28 rezultuan pozitivë me COVID-19, duke e çuar numrin total të të prekurve në 174. Një ditë më vonë më 27 mars numri i personave të prekur me COVID-19 shkoi në 186 të premten, pas zbulimit të 12 rasteve të  reja nga ISHP, e cila deri më atëherë njoftoi se kishte kryer 1246 testime gjithsej. Listës së viktimave atë ditë I shtohen edhe dy persona të tjerë. Viktimat ishin një 85-vjeçare nga Tirana dhe një 66-vjeçar nga qyteti i Fierit. Hartës së zonave të prekura iu shtua edhe qyteti i Pukës, ku u zbuluan dy raste.

28 mars. Numri i viktimave shkon në 10 vetë. Viktimat e regjistruara qenë një burrë 67-vjeç nga Tirana dhe një grua 72-vjeçare nga Vlora.Të prekur 197 persona. Më 29 mars listës së të prekurve iu shtuan edhe 15 raste të reja me COVID-19, duke e çuar numrin total të të infektuarave në Shqipëri në 212. Numri total i të testuarve nga ISHP shkoi në 1436 persona dhe harta e zonave të prekura u zgjerua edhe me Mirditën. Në spiatlin infektiv në QSUT u raportuan 76 pacientë të shtruar me COVID-19 nga të cilët 6 në terapi intensive, 4 prej tyre të intubuar.

Në tre ditët në vijim nga 29 deri më 31 mars numri i viktimave u rrit në 13 persona. Humbën jetën një burrë 79 vjec nga Tirana (më 30 mars) dhe një burrë 62 vjeç nga Durrësi dhe një grua 82 vjeçe nga Tirana (më 31 mars). Numri i personave të prekur nga COVID-19 shkoi në 243 persona, ndërkohë që në të gjithë vendin ishin kryer testimet për 1671 persona. Në Spitalin Infektiv në 31 mars kishte 77 pacientë të shtruar, nga të cilët 8 në terapi intensive dhe 3 të intubuar. Numri i personave të shëruar nga Covid u raportua 52.

SCAN Magazine 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.